Olympus Has Fallen

Eg minnist, tá eg fyrr í ár sá treylarin fyri actionfilmin “Olympus Has Fallen”. Eg helt tá ikki, at hann sá út sum nakað serligt. Mær dámar sera væl actionfilmar, so hesin filmurin burdi verið nakað fyri meg, men treylarin fekk hann ikki til at síggja lovandi út. Eg sá hann ikki í biografinum, men eg hoyrdi frá vinum, at hann var góður. Nú havi eg so endiliga sæð hann í sjónvarpinum.

Filmurin er um ein vaktarmann, sum eitur Mike Banning (Gerard Butler). Hann var fyrr vaktarmaður hjá amerikanska forsetanum (Aaron Eckhart), men varð uppsagdur, tá ið konan hjá forsetanum doyði í eini ferðsluvanlukku. Ein dagin koma nakrir koreanskir gestir at vitja hvíta húsið í Washington DC. Tað vísir seg at vera ein fella. Teir áleypa hvíta húsið, yvirtaka tað og taka forsetan sum gísli. Meðan álopið fer fram, klárar Mike Banning at goyma seg inni í húsinum, uttan at verða uppdagaður. Nú er hann tann einasti persónurin í húsinum, sum hevur møguleikan at bjarga forsetanum.

Nú tá eg havi sæð filmin í sjónvarpinum, má eg siga, at eg angri, at eg ikki hugdi eftir honum í biografinum. Hetta er faktiskt ein av teimum frægastu amerikansku filmunum, sum eg havi sæð higartil í ár. Tað er í hvussu er ein av ársins bestu actionfilmum, eftir mínari meining. “Olympus Has Fallen” er ein sera góður og undirhaldandi filmur, sum minnir nógv um gamlir actionfilmar frá 80’unum og 90’unum. Hann minnir serliga um “Die Hard” og tað er ikki yvirraskandi, tí søgan í hesum filminum líkist sera nógv søguni í “Die Hard”. Hesin filmurin er tí als ikki originalur, men tað nýtist hann ikki at vera, tí sum ein actionfilmur er hann væl gjørdur og sera undirhaldandi.

Høvuðsorsøkirnar fyri, at hann er góður, eru leikstjórnanin hjá Antoine Fuqua og framførslan hjá Gerard Butler. Eg eri positivt yvirraskaður av, at filmurin hevur góðar og dámligar persónar, sum ikki eru tunnir og óinteressantir. Mike Banning er ein kulur og sera dámligur høvuðspersónur. Gerard Butler gevur eina góða framførslu og hóskar væl til leiklutin sum ein actionhetja. Tað er kul at síggja hann fara einsamallan í kríggj ímóti eini rúgvu av fíggindum. Hinar framførslurnar eru eisini sera góðar. Aaron Eckhart er sera góður og dámligur sum forsetin. Mær dámar væl, at áðrenn húsið verður álopið, sær man gerandisdagin hjá forsetanum og lærir hann eitt sindur at kenna. Hann virkar sum ein vanligur persónur og tað gjørdi, so at eg hevði samkenslu við honum, tá hann varð tikin sum gísli. Morgan Freeman er sera góður og dámligur sum vanligt, og koreanski skurkurin er sera góður og hóttandi.

Filmurin er sera væl leikstjórnaður av Antoine Fuqua. Tempoið er skjótt og sera passaligt. 
Í fyrsta triðinginum av filminum byggir hann væl upp, hvussu hvíta húsið verður yvirtikið. Tað hendir ikki so skjótt og lætt, at tað er ov órealistiskt. Man sær, at skurkurin hevur planlagt tað væl og virðiliga. Mær dámar eisini væl, at man onkuntíð fær at vita, hvat klokkan er í filminum. Tað er við til at gera søguna spennandi. Antoine Fuqua syrgir fyri, at hjápersónarnir hava okkurt at gera og verða nóg mikið mentir. Mike Banning hevur gott samanspæl við teir og mær dámar væl, at hann er vinur við sonin hjá forsetanum. Tað er ein góð detalja.

Actionsenurnar eru ógvusligar, brutalar, spennandi og sera undirhaldandi. Gerard Butler er ein sannførandi actionsjónleikari og eg vóni, at hann fer at spæla í fleiri actionfilmum í framtíðini. Søgan er als ikki original, men kortini góð og fangandi. Hon hevur eina einfalda handling, sum syrgir fyri einum góðum actionfilmi og tað er nóg mikið í hesum førinum. Tað er tó onkuntíð eitt sindur torført at skilja ætlanirnar hjá skurkinum og endin á filminum er eitt sindur ov knappligur – hetta er tó bara smákritikkur. Men tann størsti kritikkurin, sum eg má nevna, er, at effektirnar eru onkuntíð ikki góðar. Fleiri flogfør síggja rættiliga teldugjørd út og eru tískil ikki sannførandi.

Samanumtikið er “Olympus Has Fallen” ein av ársins bestu actionfilmum og tað hevði eg ikki væntað. Eg angri, at eg ikki hugdi eftir honum í biografinum. Hugskotið um, at hvíta húsið verður yvirtikið, ljóðar ikki sum nakað nýtt, men hesin filmurin gjøgnumførir tað sera væl. Hann riggar serliga orsakað av leikstjórnanini hjá Antoine Fuqua og framførsluni hjá Gerard Butler. Actionsenurnar eru spennandi, ógvusligar og sera undirhaldandi, tempoið er passaliga skjótt og persónarnir eru dámligir. Hóast søgan ikki er nakað nýtt, var eg áhugaður allan vegin gjøgnum. Mær dámar sera væl actionfilmar og “Olympus Has Fallen” er sera gott undirhald við nóg mikið av áhugaverdum persónum.

4 / 5 stjørnur

Leikstjóri: Antoine Fuqua

Leikarar: Gerard Butler, Aaron Eckhart, Morgan Freeman, Angela Bassett, Robert Forster
Ár: 2013