Assassin's Creed

Hollywood hava enn einaferð roynt at filmatisera eitt telduspæl. Í fjør varð "Warcraft: The Beginning" útgivin og tað var satt at siga ein hampuliga góður filmur. Hvør veit? Kann tað eydnast aftur við "Assassin’s Creed"?

Søgan er um ein drápsmann, Callum Lynch (Michael Fassbender), sum er skuldsettur og situr í fangahúsi. Hansara dómur er, at luttaka í einum vísindaligum programmi. Hann verður bundin til eina maskinu, sum ger so, at hann livir lívið hjá sínum ættarfaðir í Spania í 15. øld – men tað er bara ein simulatión, eins og eitt telduspæl. Ættarfaðirin er limur í felagsskapinum Assassin’s Creed og endamálið er, at finna ein ávísan lut, sum leiðslan í fangahúsinum tørvar.

Hetta er tíverri ein vánaligur og óruddiligur actionfilmur, sum onkursvegna hevur sera góðir sjónleikarar. Spælitíðin er uml. 1 tíma og 40 minuttir, og tann fyrsti tímin er toluligur. Tá var hetta ein gloymandi, men hampuligur filmur, sum man kann hyggja eftir eina ferð og fáa tíðina at ganga – ikki serstakliga góður, men eitt sindur áhugaverdur. Síðan kemur síðsti hálvi tímin og tá dettur alt sundur. Filmurin broytist frá toluligur til ótrúliga vánaligur. Uttan at avdúka nakað, so verður søgan óruddilig og fløkjaslig. Persónar greiða frá ørkymlandi upplýsingum, sum hyggjarin burdi vitað langt frammanundan og síðan endar filmurin við einum stórum anti-klimaksi. Man skuldi trúð, at filmsfólkini royndu bert at gera eitt vánaligt upplegg til ein tveyara – tískil ikki hava ein nøktandi enda. Um filmurin kom út í Føroyum í fjør, so hevði eg sagt, at hann hevði ársins vánaligasta enda.

Hinvegin er høvuðsleikarin, Michael Fassbender, tann størsti fyrimunurin. Hann er ein sera góður sjónleikari og gevur eina góða framførslu. Hann hóskar væl til leiklutin og ger tær dramatisku senurnar sannførandi. Hinir sjónleikararnir eru eisini góðir – tó ikki sera minniligir. Marion Cotillard, Jeremy Irons og Brendan Gleeson eru sannførandi. Summir bardagar eru hampuliga undirhaldandi, men trupulleikin er, at actionsenurnar eru ikki spennandi. Tað er serliga orsakað av, at filmurin áminnir hyggjarin ov ofta, at senurnar í Spania eru ein simulatión. Tá ið Callum berjist ímóti fíggindum, klippir filmurin ofta millum fortíðina og nútíðina. Í byrjanini var tað ein kreativ effekt, men síðan oyðilegði tað spenningin, tí man varð ámintur, at bardagarnir ikki henda í veruleikanum.

Ein annar trupulleiki við actionsenunum er, at tær fara fram í oyðimørkini og hava so nógvan mjørka, at tað er keðiligt at hyggja eftir. Sandstormurin ger so, at man sær illa bardagarnir. Tónleikurin er heldur ikki góður. Tað er larmutur horntónleikur, sum ljóðar eins og ein vánalig herming av "Inception". Harumframt er filmurin ikki fangandi, tí vit læra ongantíð limirnir í Assassin's Creed at kenna. Teir eru ikki dámligir og vit vita einki um teir. Samanumtikið er hetta ein vánaligur, óruddiligur og gloymandi actionfilmur, sum hevur ein serstakliga vánaligan enda. Framførslan hjá Michael Fassbender er besti parturin av filminum. Søgan er illa søgd, tí summar baksøgur fær man ikki at vita og aðrar upplýsingar koma fram ov seint. Kanska lótu filmsfólkini vera við skriva søguna liðna, tí tey ynsktu at goyma okkurt til tveyarin. Tað er ein vánalig umbering.

2 / 5 stjørnur

Leikstjóri: Justin Kurzel

Leikarar: Michael Fassbender, Marion Cotillard, Jeremy Irons, Brendan Gleeson, 
Charlotte Rampling, Michael K. Williams 
Ár: 2016