Central Intelligence

Av øllum sjónleikarum, sum vanligt spæla í actionfilmum, so er Dwayne Johnson – eisini nevndur The Rock – ein av teimum, sum mær dámar best. Hann er sera dámligur og undirhaldandi í m.a. "Fast and Furious" røðini. Men hvat hendir, um man koyrir hann í ein actionskemtifilm saman við skemtaranum Kevin Hart?

Cal Joyner (Kevin Hart) var tann best umtókti næmingurin á miðnámsskúlanum, meðan Bob Stone (Dwayne Johnson) var tjúkkur, illa umtóktur og varð altíð happaður. Fleiri ár seinni hittast teir aftur. Nú er Bob vøddamikil og ynskir at vera vinur hansara. Cal sigur ja, men verður síðan av óvart blandaður upp í hansara arbeiði sum njósnari – tað visti hann ikki av frammanundan.

Hesin filmurin gevur Kevin Hart og Dwayne Johnson leiklutir, sum eru eitt sindur øðrvísi enn vanligt. Man væntar, at Kevin fer at vera tann fjasuti og Dwayne tann álvarsami, men satt at siga er tað umvent. Dwayne Johnson er ein actionhetja, sum eisini er stuttligur og eitt sindur býttur, meðan Kevin Hart er tann klóki, sum eisini er eitt sindur skemtiligur. Tá ið teir báðir spæla saman, er Dwayne Johnson tann býtti og Kevin Hart tann álvarsami. Tað er bæði óvæntað og ein av orsøkunum til, at hetta er ein væleydnaður skemtifilmur.

"Central Intelligence" er ein sera stuttligur og undirhaldandi filmur. Kevin Hart og Dwayne Johnson spæla sera væl saman. Tað er undirhaldandi bara at lurta eftir teirra samrøðum. Dwayne Johnson er tann besti parturin av filminum. Mær dámdi hann frammanundan sum sjónleikara, men nú hevur hann prógvað, at hann kann vera stuttligur. Hann er sera stuttligur, dámligur og undirhaldandi. Hetta er ein hansara bestu framførslum – og tað er skemtiligur leiklutur. Kevin Hart er eisini góður, stuttligur og dámligur. Allar framførslurnar eru góðar.

Mær dámdi eisini væl søguna. Tað er ein krimisøga, sum hevur nógvar yvirraskilsir. Tað riggar væl, at man sær alt frá sjónarhorninum hjá Kevin Hart. Man verður ørkymlaður og veit ikki, hvussu alt hongur saman. Søgan hevur eisini ein viðkomandi boðskap um happing og hvussu álvarsamt tað er. Actionsenurnar eru undirhaldandi og væl leikstjórnaðar. Endin á filminum er góður, men sera kliché. Tað er ein kritikkur, sum eg má nevna. Annars er hetta samanumtikið ein sera stuttligur og undirhaldandi actionfilmur við eini sera stuttligari framførslu frá Dwayne Johnson.

4 / 5 stjørnur

Leikstjóri: Rawson Marshall Thurber

Leikarar: Dwayne Johnson, Kevin Hart, Amy Ryan, Aaron Paul, Danielle Nicolet 
Ár: 2016