American Hustle

Ein filmur, sum hevur fingið nógvar Oscar-tilnevningar í ár, er “American Hustle”. Hann er leikstjórnaður av David O. Russell, sum eisini gjørdi m.a. “The Fighter” og “Silver Linings Playbook”. Hann hevur eisini ein sera góðan lista av sjónleikarum: Christian Bale, Amy Adams, Bradley Cooper, Jennifer Lawrence, Jeremy Renner og onnur.

Filmurin fer fram í 1970’unum. Vit fylgja tveimum brotsfólkum, Irving (Christian Bale) og Sydney (Amy Adams), sum lumpa fólk, fyri at stjala pening. Tey verða noydd til, at arbeiða saman við einum FBI-agenti, Richie DiMaso (Bradley Cooper). Tey skulu lumpa borgarstjóran (Jeremy Renner) og fanga nakrir korruptir politikarar.

Hesin filmurin hevur fingið sera góð ummæli og eina Oscar-tilnevning fyri besta film. Men eg eri keddur av at siga, at eg var skuffaður av honum. Hesin filmurin fangaði meg ikki og eg helt, at hann var tískil eitt sindur keðiligur og óinteressantur. Hann er sera væl spældur, flott gjørdur og faktiskt eitt sindur undirhaldandi, men mær dámdi ikki søguna og persónarnir. Eftir mínari meining hevur hann ikki eina góða søgu og áhugaverdir persónar.

Framførslurnar eru sera góðar. Mær dámdi best Christian Bale. Hann er fantastiskur í filminum. Hann hevur tikið nógv kilo uppá til leiklutin og tosar við eini sannførandi dialekt. Persónurin, sum hann spælir, er tann, sum mær dámar best. Hann er ein óreinur brotsmaður, men ofta sær man á honum, at hann innast inni hevur eina samvitsku – og tað dugir Christian Bale væl at spæla. Bradley Cooper er sera góður, men persónurin, sum hann spælir, er ikki sera dámligur. Hann er ein egoistiskur idiotur og í seinnu helvtini av filminum dámdi mær hann ikki. Bradley Cooper gav eina sera góða framførslu, men mær dámdi ikki leiklutin.

Amy Adams er góð, men persónurin, sum hon spælir, er óinteressantur. Hon hevur ikki ein áhugaverdan persónleika og virkar ikki sera týdningarmikil fyri søguna. Hon hevur nógv at gera, tá hon í byrjanini arbeiðir saman við Christian Bale, men aftaná at Bradley Cooper fer í parti við teimum, ger hon ikki nógv til nyttu. Christian Bale og Bradley Cooper gera ofta tað mesta av arbeiðinum, meðan hon er við í bakgrundini. Jennifer Lawrence er rættiliga góð og syrgir fyri nøkrum stuttligum løtum. Jeremy Renner er eisini góður og Louis C.K. er sera undirhaldandi.

Filmurin er sera flott gjørdur. Tað er sannførandi, at hann fer fram í 1970’unum. Kulissurnar og búnarnir eru flottir og sannførandi. Kameraarbeiðið er eisini gott og sangirnir eru undirhaldandi. David O. Russell hevur gjørt eitt gott arbeiði við, at skapa eitt umhvørvi frá 1970’unum. Tempoið er passaliga skjótt og dialogurin er góður. Hann er ikki fantastiskur, men væl skrivaður og hevur nakrar stuttligar samrøður. Filmurin er samanumtikið væl leikstjórnaður, men eg haldi ikki, at handritið er sera gott – burtursæð frá góðum dialogi.

Søgan er tunn og ikki sera fangandi. Høvuðspersónarnir royna at lumpa ein borgarstjóra og fanga nakrir korruptir menn. Man fær ikki nógv at vita um hesir menninir og borgarstjórin er ein fittur og dámligur maður, so eg síggi onga spennandi konflikt í tí. Borgarstjórin er dámligur, so tað er ikki sera spennandi, um høvuðspersónarnir klára at lumpa hann. Harafturat var Irving tann einasti høvuðspersónurin, sum eg var eitt sindur áhugaður í. Framførslurnar hjá høvuðsleikarunum eru sera góðar, men leiklutirnir eru tunnir og óinteressantir.

“American Hustle” er flott gjørdur, sera væl spældur og eitt sindur undirhaldandi, men samanumtikið óinteressantur og eitt sindur keðiligur. Framførslurnar eru sera góðar, serliga Christian Bale. Filmurin koyrir við skjótum tempoi og góðum dialogi, so hann er eitt sindur undirhaldandi, men tað ger hann ikki góðan. Burtursæð frá góðum dialogi, so er handritið ikki gott. Søgan er ikki spennandi og persónarnir eru tunnir. Filmurin er bara ikki fangandi.

2,5 / 5 stjørnur

Leikstjóri: David O. Russell

Leikarar: Christian Bale, Amy Adams, Bradley Cooper, Jennifer Lawrence, Jeremy Renner, 

Louis C.K.

Ár: 2013