About Time

Ein filmur, sum eg ikki sá í biografinum í fjør, var bretski kærleiksfilmurin “About Time”. Hann er skrivaður og leikstjórnaður av Richard Curtis, sum eisini hevur gjørt “Love Actually” og skrivað m.a. “Notting Hill” og “Four Weddings and a Funeral”. Hann er mest kendur fyri sínir kærleiksfilmar og hann hevur kunngjørt, at “About Time” er møguliga tann síðsti filmurin, sum hann leikstjórnar.

Tá ið Tim (Domhnall Gleeson) fyllir 21 ár, fær hann at vita frá pápa sínum (Bill Nighy), at menninir í familjuni kunnu ferðast aftur í tíðina. Teir kunnu liva partar av teirra egna lívi umaftur og gera tað øðrvísi. Tim flytir síðan til London og verður forelskaður í eini kvinnu úr USA, sum eitur Mary (Rachel McAdams). Hann byrjar so, at ferðast gjøgnum tíðina, fyri at gera hansara lív betri – og eisini hansara forhold við Mary.

Eg var upprunaliga ikki áhugaður í hesum filminum. Plakatin og treylarin gjørdu, so at hann líktist einum sera týpiskum kærleiksfilmi, sum bert hevði eina handling um, at ferðast gjøgnum tíðina, í bakgrundini. Ein týpiskur kærleiksfilmur kann vera góður, men í hesum førinum helt eg ikki, at hann sá út til, at vera nakað serligt. Men eg gav honum ein kjans, tí hann fekk nøkur góð ummæli og Richard Curtis er ein dugnaligur rithøvundur. Eg eri glaður fyri at siga, at “About Time” er ein góð yvirraskilsi.

Hetta er ein sera góður filmur, sum hevur eina søgu, ið ikki er bert um eitt kærleiksforhold. Hon er satt at siga nógv djúpri enn tað og eg fari sjálvandi ikki, at avdúka nakrir týdningarmiklir partar. Richard Curtis hevur skrivað eitt sera gott handrit, sum brúkar væl handlingina um, at ferðast gjøgnum tíðina. Tað verður ikki brúkt ov ofta. Onkuntíð verður tað brúkt til skemt og onkuntíð til drama. Tað er tíbetur væl balanserað og verður ongantíð irriterandi ella ørkymlandi. Søgan er samanumtikið sera góð og áhugaverd, og hevur ein viðkomandi boðskap.

Handritið hevur eisini góðan dialog og gott skemt. Dialogurin var tað fyrsta, sum fangaði meg í byrjanini á filminum. Samrøðurnar eru væl skrivaðar og áhugaverdar. Mær dámdi sera væl samrøðurnar milllum Tim og pápan. Forholdið millum teirra er áhugavert og væl gjøgnumført. Skemtið er stuttligt, einfalt og passaliga undirhaldandi. Dramaið er sera gott og væl eydnað. Tað var eg yvirraskaður av. Eg varð satt at siga onkuntíð keddur og rørdur. Framførslurnar eru sera góðar. Domhnall Gleeson er ein góður og dámligur høvuðsleikari. Rachel McAdams er sera góð og sjarmerandi. Samanspælið millum teirra er gott og sannførandi.

Bill Nighy gevur eina sera góða framførslu. Hann er sera dámligur og fangandi. Filmurin hevur eisini stuttligar framførslur frá Tom Hollander og Joshua McGuire. Eg má leggja afturat, at ein onnur grund til, at søgan riggar væl, er, at persónarnir eru dámligir. Mær dámdi væl Tim og Mary, og mær dámdi sera væl pápan. Forholdini millum persónarnir eru áhugaverd og væl skrivað. Kærleiksforholdið millum Tim og Mary er sannførandi og áhugavert, og familjuforholdini rigga eisini væl.

“About Time” er ein sera góður kærleiksfilmur við eini søgu, sum er nógv djúpri, enn man hevði væntað. Framførslurnar eru sera góðar, serliga Bill Nighy, dialogurin er góður og persónarnir eru dámligir. Fyri at koma við kritikki, so má eg fyrst og fremst nevna, at onkuntíð verður tempoið ov seint. Tá verður filmurin eitt sindur langdrigin. Handlingin um, at ferðast gjøgnum tíðina, hevur nakrar feilir, men tað hava slíkar søgur næstan altíð. Hon verður tíbetur ikki brúkt ov ofta og Richard Curtis klárar væl, at brúka tað til bæði skemt og drama. Filmurin hevur eisini ein góðan og viðkomandi boðskap, sum eg ikki ætli mær at avdúka.

4 / 5 stjørnur

Leikstjóri: Richard Curtis

Leikarar: Domhnall Gleeson, Rachel McAdams, Bill Nighy, Lydia Wilson, Lindsay Duncan,

Tom Hollander, Margot Robbie, Joshua McGuire

Ár: 2013