Baby Driver

Eg mangli at ummæla ein teknifilm afturat og tað er "Zootropolis". Ummælið kemur út í komandi viku, so í dag verður tað í staðin nýggi actionfilmurin "Baby Driver". Hann er skrivaður og leikstjórnaður av Edgar Wright, sum eisini er leikstjórin handan "Hot Fuzz" og "Scott Pilgrim vs. the World". Søgan er um ein drong, sum eitur Baby (Ansel Elgort). Hann arbeiðir sum bilførari hjá brotsmanninum Doc (Kevin Spacey) og lurtar altíð eftir tónleiki, tí hann hevur tinnitus.

Hetta er ein sera góður og undirhaldandi filmur. Tað er uppfrískandi at síggja ein Hollywood film, sum er originalur og ikki hoyrir til eina filmsrøð. Hetta er ikki ein tveyari, endurinnspæling ella nakað líknandi. Hetta er eisini tann mest óforútsiguligi filmurin, sum eg havi sæð nýliga í biografinum. Søgan er væl skrivað og eg visti ikki, hvat fór at henda. Hvørja ferð eg gitti okkurt, vísti tað seg at vera skeivt. Søgan er spennandi, óvanlig og yvirraskandi – eg fari sjálvandi ikki at avdúkað nakað. Hon verður meira og meira spennandi, sum tíðin gongur og endar við einum fantastiskum klimaksi.

Handritið er uppbygt soleiðis, at vit gjøgnum filmin spakuliga læra persónarnir at kenna. Baby er ein dámligur høvuðspersónur, hóast hann er ein brotsmaður. Hann hevur ein góðan og dámligan persónleika, sum ikki samsvarar við starvið. Allar framførslurnar eru sera góðar og Ansel Elgort er ein góður høvuðsleikari. Mær dámdi serstakliga væl Kevin Spacey, Jon Hamm og Jamie Foxx. Dialogurin er væl skrivaður, undirhaldandi og hevur nógv stuttligt skemt.

Mær dámar sera væl mátan, ið Edgar Wright hevur leikstjórnað filmin. Hann er ein sera kreativur leikstjóri, sum fær tónleik til at passa væl við hendingarnar. Eitt gott dømi er ein skotbardagi, har ið skotini samsvara við rútmuna í sanginum – ein sera undirhaldandi effekt. Av tí at Baby ofta lurtar eftir iPod, so hevur filmurin eina rúgvu av sera góðum sangum. Myndatøkan og klippingin er sera góð, og actionsenurnar eru væl leikstjórnaðar. Edgar Wright hevur gott skil fyri tempo og ger filmar, ið eru undirhaldandi frá byrjan til enda.  

"Baby Driver" er ein sera góður og undirhaldandi actionfilmur, sum er øðrvísi enn flestu poppkornfilmar. Í byrjanini er søgan einføld, men verður síðan meira og meira spennandi. Mær dámar væl, at hon er óforútsigulig og óvanlig. Tónleikurin er sera undirhaldandi og leikstjórnanin er kreativ. Hóast mær dámar superhetjufilmar, so er tað sera gott at síggja okkurt originalt frá Hollywood. Eg vóni, at fleiri fara at hyggja eftir "Baby Driver" í biografinum, tí originalir poppkornfilmar mugu fáa stuðul.

4 / 5 stjørnur

Leikstjóri: Edgar Wright 

Leikarar: Ansel Elgort, Kevin Spacey, Lily James, Jon Bernthal, Eiza González, Jon Hamm, Jamie Foxx 

Ár: 2017