Non-Stop

Eg tók ein langan steðg frá, at ummæla filmar, men eg eri ikki givin. Í síðstu viku var eg í Havnar Bio og hugdi eftir “Non-Stop”. Eg eri ein stórur fjeppari av Liam Neeson. Hann er ein sera góður sjónleikari og hóskar væl til leiklutir í actionfilmum.

“Non-Stop” er um ein mann, Bill Marks (Liam Neeson), sum fer til arbeiðis á einum flogfari – hann er ein “air marshal”; eitt slag av politisti. Brádliga fær hann eini SMS-boð frá einum ókendum persóni. Hesin persónurin skrivar, at hvønn 20. minutt fer onkur umborð á flogfarinum at doyggja, inntil hann fær 150 milliónir dollarar.

Hetta er ein einfaldur spenningsfilmur, sum bert vil vera undirhald. Hann hevur ikki líka nógv action, sum eg hevði væntað. Hetta er meira ein spenningsfilmur við eitt sindur av action og satt at siga, so er tað ikki so galið. Hesin filmurin er hampuliga góður, spennandi og undirhaldandi. Hann hevur nógvar feilir og søgan er ikki góð – tað vendi eg aftur til – men samanumtikið er hann undirhaldandi. Eg var eitt sindur stúrin fyri, at hann fór at vera eins og “Taken 2” – ein tann vánaligasti actionfilmurin hjá Liam Neeson. Tað er hann tíbetur ikki. Hann er væl leikstjórnaður og spældur.

Liam Neeson gevur eina góða og fangandi framførslu sum vanligt. Julianne Moore, Lupita Nyong’o, Cory Stroll og hinir leikararnir eru eisini góðir. Tað var gott at síggja Corey Stroll, sum er kendur fyri sín leiklut í “House of Cards”. Søgan er satt at siga góð í fyrru helvtini av filminum, men verður rættiliga býtt í seinnu helvtini. Tíbetur klára Liam Neeson og actionsenurnar at bjarga seinnu helvtini, so at hon framvegis er undirhaldandi – men ikki líka góð sum fyrra helvtin.

Actionsenurnar eru væl leikstjórnaðar og hampuliga undirhaldandi. Mær dámdi væl ein ávísan bardaga, sum fór fram inni á vesinum á flogfarinum. Tað er eitt lítið og trongt rúm, men bardagin er kortini væl upptikin. Kameravinklarnir vísa væl, at rúmið er trongt og samstundis sær man væl alt, sum hendir – í mun til “Taken 2”, har tað rokasliga kameraarbeiðið oyðilegði bardagarnir. Mær dámdi eisini væl gátuna um, hvør sendi Liam Neeson SMS-boðini. Tað var fangandi, áhugavert og tíbetur ikki lætt at rokna út. Men sum eg segði í áðni, so hevur filmurin nógvar feilir og eina trupla seinnu helvt.

Fyri tað fyrsta er Bill Marks ikki altíð ein dámligur høvuðspersónur. Hann tekur nakrar býttar avgerðir. Hann er t.d. ofta ov harðligur við ferðafólkini. Hann skeldar og hóttir fólk, sum hann misteinkir, við einum revolvara. Tað er býtt og ófornuftigt, tí so fara tey sjálvandi ikki at líta á hann. Fyri tað næsta er søgan rættiliga býtt og órealistisk. Tað verður torført at góðtaka í seinnu helvtini. Harafturat hevur filmurin nøkur stutt klipp uttanfyri flogfarinum, sum innihalda vánaligar effektir. Men tann størsti trupulleikin er, at endin á filminum er vánaligur og “cheesy”, um man kann siga soleiðis. Tað hóskar ikki til restina av filminum, sum er meira dapur og spennandi.

Men samanumtikið er “Non-Stop” ein hampuliga góður og undirhaldandi spenningsfilmur. Hann leverar gott action og eina spennandi handling. Søgan fer av sporinum í seinnu helvtini og hevur ein vánaligan enda, men filmurin var samanumtikið undirhaldandi. Tað er ikki ein filmur, sum eg umhugsi at hyggja eftir umaftur, men sum ein einfaldur poppkornfilmur, so er hann hampuliga góður. Harafturat gevur Liam Neeson eina góða framførslu, hóast hansara leiklutur ikki er sera væl skrivaður.

3 / 5 stjørnur

Leikstjóri: Jaume Collet-Serra

Leikarar: Liam Neeson, Julianne Moore, Scoot McNairy, Michelle Dockery, Corey Stroll, Lupita Nyong’o

Ár: 2014