Captain America: The Winter Soldier

Mær dámar væl superhetjufilmar, men eg var tó ikki sera spentur til tann nýggja Marvel-filmin, “Captain America: The Winter Soldier”. Hann sá út til at vera góður, men eg helt, at aftaná “The Avengers” vóru filmarnir hjá Marvel byrjaðir at gerast endurtakandi. Men eg eri glaður fyri at siga, at hesin filmurin er øðrvísi og nógv betri, enn eg hevði væntað.

Síðan hendingarnar í “The Avengers” hevur Steve Rogers (Chris Evans) arbeitt sum Captain America fyri SHIELD saman við m.a. Black Widow (Scarlett Johansson). Brádliga verður felagið hótt av einum gátuførum drápsmanni, sum kallast The Winter Soldier og eg ætli mær ikki at avdúka meir enn tað.

Mær dámdi hendan filmin nógv betri enn “Iron Man 3” og “Thor: The Dark World”. Hetta er tann fyrsti fantastiski filmurin hjá Marvel síðan “The Avengers”. Ein av orsøkunum er, at stílurin er øðrvísi. Hetta er ein krimifilmur í staðin fyri bert ein actionfilmur. Hann leverar actionsenurnar, sum hoyra til ein slíkan superhetjufilm, men er fyrst og fremst ein krimifilmur. Hann leggur dent á eina gátuføra søgu – eitt sindur sum ein detektivfilmur. Tað er tíbetur rættiliga væl gjøgnumført, og úrslitið er ein fangandi og áhugaverd søga.

Eg havi hoyrt ymiskar meiningar um tann fyrra filmin um Captain America, sum kom út í 2011. Eg kenni fleiri fólk, sum ikki dáma hann. Eg sá ongantíð allan filmin, men eftir tí at døma, sum eg sá, so helt eg hann vera hampuliga góðan. Hann var ikki nakað serligt, men hevði ein dámligan høvuðspersón og vísti seinna heimsbardaga frá einum áhugaverdum sjónarhorni. Men tvey’arin er nógv betri. Hann er meira áhugaverdur, spennandi og undirhaldandi. Teir nýggju leikstjórarnir, Anthony og Joe Russo, hava gjørt eitt sera gott arbeiði.

Fyri tað fyrsta eru actionsenurnar fantastiskar og sera væl leikstjórnaðar. Effektirnar eru flottar og sannførandi. Eg havi hoyrt, at filmurin brúkar nógvar praktiskar effektir og tað sæst, tí eg uppdagaði ongantíð eina opinlýsa teldugjørda effekt. Kameraarbeiðið er serstakliga gott. Filmurin brúkar nógvar góðar heildarmyndir, sum rigga sera væl í actionsenunum. Filmurin er samanumtikið sera væl upptikin og brúkar nakrar penar heildarmyndir, sum eg ikki havi sæð fyrr í slíkum superhetjufilmum. Tónleikurin er eisini rættiliga góður.

Framførslurnar eru sera góðar. Chris Evans er góður og ein sera dámligur høvuðsleikari. 
Hann er sjarmerandi, og dugir at vera bæði stuttligur og álvarsamur, tá ið tað er neyðugt. Scarlett Johansson er eisini góð og spælir væl saman við Chris Evans. Mær dámar væl, at Black Widow hevur ein góðan persónleika í filminum. Hon er ikki bara pen og ein sannførandi actionhetja, men eisini ein dámligur persónur. Samuel L. Jackson er framvegis kulur sum Nick Fury og Robert Redford er sera góður. Mær dámdi eisini væl tann nýggja persónin, Sam Wilson, sum verður leiktur av einum sera dámligum sjónleikara, Anthony Mackie.

Eg eri eisini glaður fyri at siga, at skurkurin er rættiliga góður. Í fjør varð eg skuffaður av skurkunum í øllum superhetjufilmunum, men nú hava Marvel endiliga rættað tann feilin. 
Tá eg hugsi aftur á filmarnir hjá Marvel higartil, so er hesin tann, sum mær beint nú dámar triðbest – aftaná “The Avengers” og “Iron Man”. Hann er sera undirhaldandi, væl spældur og væl upptikin. Framførslurnar eru góðar og søgan er fangandi. Filmurin hevur eisini stuttligt skemt, sum tíbetur ikki verður brúkt ov ofta – tað var ein trupulleiki í “Thor: The Dark World”. Eg má tó leggja afturat, at filmurin er ikki verdur at hyggja eftir í 3D. Effektin sæst næstan ikki og er tískil óneyðug, so eg viðmæli 2D-útgávuna.

4 / 5 stjørnur

Leikstjóri: Anthony Russo og Joe Russo
Leikarar: Chris Evans, Scarlett Johansson, Sebastian Stan, Anthony Mackie,
Cobie Smolders, Robert Redford, Samuel L. Jackson
Ár: 2014