Kon-Tiki

“Kon-Tiki” er ein norskur filmur, sum er gjørdur eftir eina sanna søgu. Tað er søgan um eina ferð hjá normanninum Thor Heyerdahl. Eg visti lítið um filmin og søguna, men eg hevði uppdagað, at fólk vóru áhugað í at síggja hendan filmin. 

Filmurin fer fram í 1940’unum. Normaðurin Thor Heyerdahl er sannførdur um, at fólkini í Polynesia vóru ættað úr Suður-Amerika. Eingin trýr honum, so hann setir sær fyri at prógva, at tað bar til fyrr í tíðini, at sigla úr Suður-Amerika til Polynesia. Hann savnar tí fimm menn og teir byggja ein flaka úr somu útgerðini, sum varð nýtt fyrr í tíðini. Síðan sigla teir á flakanum, sum eitur “Kon-Tiki”, úr Peru og ætlanin er, at sigla tvørtur um Kyrrahavið til Polynesia.

Hetta er samanumtikið ein filmur um eina ferð tvørtur um Kyrrahavið. Ein sonn søga um ein mann, sum fór á eina vandamikla ferð, fyri at prógva sína teori. Eg væntaði ikki nógv av filminum og eg má siga, at eg var sera imponeraður. “Kon-Tiki” er ein av teimum bestu filmunum, sum eg havi sæð higartil í ár. Hann tekur hyggjaran við á eina fantastiska ferð, sum realistiskt vísir, hvussu tað er, at sigla fleiri túsund kilometrar á flaka. Tað er eisini ótrúligt, at hann er gjørdur eftir eina sanna søgu, tí tað vísir, hvussu djørv summi fólk kunnu vera – eg visti næstan einki um ta sonnu søguna, áðrenn eg sá filmin.

Filmurin kemur eitt sindur seint í gongd, men eg var forvitin eftir at síggja, hvat fór at henda, tá ið persónarnir fóru avstað. Í byrjanini kláraði filmurin væl at presentera høvuðspersónin og syrgja fyri, at man lærdi hann at kenna, men tað tók eitt sindur av tíð, inntil sjálva søgan gjørdist fangandi. Danski sjónleikarin Søren Pilmark var við í einari senu og gav eina góða framførslu, men filmurin greiddi illa frá, hvør persónurin var og hvat meiningin var við honum. Men tað er bara ein sena í byrjanini, so tað er ikki ein stórur trupulleiki. Filmurin greiddi annars væl frá, hvørjar ætlanir Thor Heyerdahl hevði, og presenteraði væl høvuðspersónarnir. Tá ið ferðin so endiliga byrjaði, gjørdist filmurin fangandi, spennandi og samanumtikið fantastiskur.

Filmurin syrgir fyri, at man sum hyggjari følir, at man er staddur á einum flaka úti á havinum. Tá ið ferðin byrjar, er ikki nógvur dialogur og tað dámdi mær sera væl. Man sær bara persónarnir arbeiða og hyggja runt, uttan at siga nakað, og tað ger, so at man følir, at man er staddur úti á havinum saman við teimum. Tað er sannførandi og realistiskt. Filmurin riggar eisini, av tí at allir persónarnir á flakanum eru dámligir og hava ymiskar persónleikar. Man dámar teir, hevur samkenslu við teimum og ynskir, at teir skulu klára hesa uppgávuna. Dialogurin millum teirra er góður, undirhaldandi og væl skrivaður. Filmurin klárar eisini væl at balansera skemt, drama og spenning. Dramaið er realistiskt og væl gjørt, og skemtið er gott og hóskandi. Tað er einfalt skemt, sum t.d. stuttligur dialogur, har persónarnir arga hvønn annan og siga okkurt stuttligt. Mær dámar eisini væl, tá ið filmurin vísir upptøkur, sum persónarnir upptaka á einum videotóli, ið teir hava við sær á ferðini.

Filmurin byggir eisini væl upp spenning. Hann vísir m.a., hvussu vandamikið og krevjandi tað er, at fara á eina slíka ferð. Summar senur eru nervapirrandi og sera spennnandi. Eg var positivt yvirraskaður av, at ofta tá eg helt meg vita, hvat fór at henda í einari senu, hendi okkurt heilt annað ístaðin. Eg var eisini sera imponeraður av, hvussu flott gjørdur filmurin var. Hann hevur sera flottar effektir og nakrar sera vakrar myndir. Kameraarbeiðið er sera flott og brúkar nakrar góðar vinklar. Ein sena, har persónarnir lóu á flakanum og hugdu eftir stjørnunum, var ótrúliga flott gjørd og væl upptikin. Eg avdúki ikki, hvat hendi í senuni, men hon var so imponerandi, at eg var púra málleysur. Tónleikurin er eisini fantastiskur, og endin á filminum er sera nøktandi og væl spældur.

“Kon-Tiki” er ein av teimum bestu filmunum, sum eg havi sæð higartil í ár. Eg væntaði ikki nógv av honum og eg var sera imponeraður. Hann hevur nakrar trupulleikar í byrjanini og er eitt sindur ov langur, men samanumtikið fantastiskur og sera flott gjørdur. Hann fekk meg til at føla, at eg var staddur á einum flaka úti á Kyrrahavinum, og tað gjørdi filmin fangandi og spennandi. Framførslurnar eru eisini sera góðar, serliga Pål Sverre Hagen sum Thor Heyerdahl. Hetta er ein fantastiskur filmur, sum tekur hyggjaran við á eina spennandi ferð.

4,5 / 5 stjørnur

Leikstjórar: Joachim Rønning og Espen Sandberg

Leikarar: Pål Sverre Hagen, Anders Baasmo Christiansen, Gustaf Skarsgård

Ár: 2012