Pirates of the Caribbean: Salazar's Revenge

Johnny Depp er farin aftur til ein av hansara kendastu leiklutum, Captain Jack Sparrow. "Pirates of the Caribbean" er ein tann mest vælumtókta filmsrøðin hjá Disney. Eittarin kom út í 2003 og hetta er fimti filmurin í røðini.

Ein fíggindi hjá Captain Jack Sparrow (Johnny Depp), sum eitur Salazar (Javier Bardem), er flýddur og vil hevna seg. Jack avger, at fara út at leita eftir einum gandakendum luti, "Trident of Poseidon". Stjørnufrøðingurin Carina (Kaya Scodelario) og Henry Turner (Brenton Thwaites) – sonur Will og Elizabeth – koma við.

Eg eri ikki ein stórur fjeppari av røðini. Mær dámar eittarin, men hann er ikki ein av mínum yndisfilmum. Hann er undirhaldandi og stuttligur. Mær dámar best Captain Jack Sparrow og Barbossa, men eri ikki áhugaður í summum persónum – m.a. Will Turner. "Pirates of the Caribbean: Salazar’s Revenge" bjóðar undirhaldandi løtur, men er samanumtikið eitt vónbrot.

Filmurin er leikstjórnaður av Joachim Rønning og Espen Sandberg. Mær dámdi sera væl teirra seinasta film, "Kon-Tiki" – ein sera góður norskur filmur. Eg eri skuffaður av teirra verki hesuferð. Kanska megnaðu teir ikki, at skifta til ein stóran Hollywood film. Actionsenurnar eru illa leikstjórnaðar og myndatøkan er ofta ov myrk. Einaferð hoppar Captain Jack Sparrow á kanónum og man sær einki. Kameraið flýgur í ymsar ættir og umhvørvið er bølamyrkt. Onkuntíð er klippingin ov skjót og man sær illa bardagarnir.

Tíbetur er skemtið framvegis gott, og mær dámar framvegis Captain Jack Sparrow og Barbossa. Johnny Depp og Geoffrey Rush eru sera góðir og undirhaldandi. Javier Bardem gevur eina góða framførslu, men leikluturin er rættiliga kliché. Hann er ein týpiskur skurkur, sum ikki er sera áhugaverdur. Eg var heldur ikki áhugaður í Henry og Carina. Tey eru keðiligir høvuðspersónar – serliga samanborið við Captain Jack Sparrow og Barbossa. Mín yndissena er fyrstu ferð, tá vit hitta Captain Jack Sparrow. Tað er ein stuttlig, yvirdrivin og undirhaldandi actionsena við góðum skemti og flottum effektum. Mær dámar væl senur, tá ið Jack er í vanda og má finna eina loysn, fyri at yvirliva. 

Hetta er tann stytsti filmurin í røðini, men tíverri megnar hann ikki at vera undirhaldandi frá byrjan til enda. Hann verður langdrigin í seinnu helvtini, av tí at søgan er tunn og skurkurin er óinteressantur. Harumframt er klimaksið vánaligt og illa leikstjórnað. Tað hevur ringa ávirkan á allan filmin, tí øll søgan byggir upp til tað. Senan hevur nakrar góðar effektir, men er annars illa upptikin, illa skrivað og skuffandi. "Pirates of the Caribbean: Salazar's Revenge" er ikki sera minniligur, hóast hann hevur gott skemt og nakrar undirhaldandi senur. Umframt at søgan er tunn, so er tað eisini ein stórur trupulleiki, at actionsenurnar eru illa upptiknar. Tær eru ein av høvuðsorsøkunum til, at man hyggur eftir hesi filmsrøðini í biografinum.

2,5 / 5 stjørnur

Leikstjórar: Joachim Rønning, Espen Sandberg 

Leikarar: Johnny Depp, Javier Bardem, Brenton Thwaites, Kaya Scodelario, Kevin McNally, Geoffrey Rush 

Ár: 2017