Finding Nemo

Í samband við, at "Finding Dory" er komin út hetta vikuskiftið, so havi eg avgjørt at ummæla eittarin, "Finding Nemo". Eg sá hendan teknifilmin í biografinum í 2003 og nú – 13 ár seinni – er ein tveyari komin út. Eg ætli mær at ummæla "Finding Dory" seinni – eg havi ikki sæð hann enn.

Fiskurin Marlin (Albert Brooks) ræðist havið og ansar ov væl eftir soninum, Nemo (Alexander Gould). Tá ið Nemo verður tikin av nøkrum kavarum, fer hann út at leita honum – við hjálp frá einum gloymskum fiski, Dory (Ellen DeGeneres).

Tá ið "Finding Nemo" kom út, gjørdist hann mín yndisfilmur hjá Pixar. Nú hava tey verið virkin í meir enn 20 ár og sett støðið høgt við filmum sum t.d. "Toy Story", "Ratatouille" og "Up". Eg havi sæð "Finding Nemo" fleiri ferðir, men hesa vikuna hugdi eftir honum fyri fyrstu ferð aftaná nøkur ár. Tíbetur er hann framvegis ein sera góður teknifilmur.

Animatiónin er sera góð og heimurin er flott gjørdur. Tað er sannførandi, at alt fer fram undir sjónum. Tað er spennandi at uppliva hendan heimin og síggja alt frá sjónarhornunum hjá fiskum. Allir persónarnir eru dámligir og røddirnar hóska væl til. Dory er stuttlig, undirhaldandi og dámlig. Tað er stuttligt, at hon blívir við at gloyma alt og er tískil sera optimistisk. Um okkurt keðiligt hendir, so gloymir hon tað og verður glað aftur. Tað ger hana dámliga. Harfturat gevur Ellen DeGeneres eina sera góða framførslu.

Eitt, sum er serliga uppdagaði, tá eg stutt síðan hugdi eftir filminum umaftur, var skemtið. Hesin filmurin er sera stuttligur – allan vegin gjøgnum. Marlin og Dory hitta eina rúgvu av stuttligum persónum – t.d. tær býttu likkurnar, sum altíð fáa meg at flenna. Filmurin hevur skemt, sum er hóskandi fyri bæði børn og vaksin. Tað er nakað, sum Pixar duga serstakliga væl: At gera filmar, sum eru undirhaldandi fyri bæði. Eg uppdagaði summar jokes í "Finding Nemo", sum eg ikki skilti, tá eg var lítil.

Søgan er einføld, men góð og sera rørandi. Tað er ein fangandi og væl skrivað søga um forholdið millum ein pápa og son hansara. Tað er endamálið við søguni og tann parturin er væleydnaður. Hinvegin er søgan so mikið einføld, at úrslitið er ikki ein heilt fantastiskur filmur. Hann er sera góður, men ikki ein av mínum yndisteknifilmum. Søgan er bygd soleiðis, at vit fara á eina ferð og hitta ymiskir persónar – eins og ein "road movie". Hon er eitt sindur forútsigulig og hevur ikki nógvar yvirraskilsir. Søgan er góð, men ikki fantastisk. Tískil er tað ikki longur mín yndisfilmur hjá Pixar, men mær dámar hann framvegis sera væl.

"Finding Nemo" er ein sera góður og sjarmerandi teknifilmur, sum tekur hyggjaran við á eina hendingarríka ferð tvørtur um havið. Søgan er góð, skemtið er sera gott og allir persónarnir eru dámligir – eingin er irriterandi. Animatión er so mikið góð, at tað følist spennandi og sannførandi at uppliva hendan teldugjørda heimin undir sjónum – eg gleði meg til at vitja hann aftur í "Finding Dory". Tónleikurin hjá Thomas Newman er fantastiskur og mær dámar serstakliga temasangin, sum verður spældur í byrjanini, tá ið heitið á filminum verður víst. Harumframt er hetta ein av teimum stuttligastu teknifilmunum, sum eg havi sæð fyri tíðina, og hann hevur eisini nakrar sera rørandi og dramatiskar løtur.

4 / 5 stjørnur

Leikstjóri: Andrew Stanton

Leikarar: Albert Brooks, Ellen DeGeneres, Alexander Gould, Willem Dafoe, Brad Garrett, Allison Janney, Austin Pendleton, Stephen Root, Vicki Lewis, Geoffrey Rush 
Ár: 2003