Kingsman: The Secret Service

Leikstjórin av "Kick-Ass" og "X-Men: First Class", Matthew Vaughn, er komin við einum nýggjum bretskum actionfilmi við heitinum "Kingsman: The Secret Service". 




Søgan er um ein drong (Taron Egerton), sum hittir ein njósnara (Colin Firth) og verður bjóðaður uppí felagið, ið hann arbeiðir fyri. Njósnararnir verða róptir "kingsman" og teir skulu steðga einum skurki (Samuel L. Jackson).

Marknaðarføringin fyri "Kingsman: The Secret Service" hevur verið diskret. Man veit ikki nógv um filmin og treylarin avdúkar lítið. Eg eri yvirraskaður av úrslitinum. Hetta er satt at siga ein av teimum bestu actionfilmunum, sum eru komnir út í fleiri ár. Hann er sera undirhaldandi, ógvusligur, stuttligur, væl leikstjórnaður og yvirdrivin. Tað er eisini ein góður njósnarafilmur, um man kann kalla tað soleiðis. Man kann siga, at tað er ein góð parodi av James Bond.

Actionsenurnar eru fantastiskar – tær bestu, sum eg havi sæð í langa tíð. Tær eru sera undirhaldandi, flott gjørdar, kreativar og væl leikstjórnaðar – serliga bardagarnir. Tær hava ein kulan og øðrvísi stíl. Kameraarbeiðið er sera gott. Tað er ikki rokasligt í actionsenunum, eins og í øðrum actionfilmum fyri tíðina – t.d. "Taken 3". Eg vil ikki avdúka ov nógv um, hvussu væl gjørdir bardagarnir eru, tí tað er ein góð yvirraskilsi í filminum. 

Eitt, sum riggar serstakliga væl, er, at Matthew Vaughn hevur savnað eina rúgvu av fantastiskum og kendum sjónleikarum, sum t.d. Colin Firth, Samuel L. Jackson og Michael Cain. Tað riggar serstakliga væl, tí allir sjónleikararnir gera sítt besta. Eg havi ongantíð fyrr sæð Colin Firth í einum actionleikluti og tað er væleydnað. Hann hóskar væl til leiklutin sum ein eingilskur gentlemaður, sum samstundis er ein kul, hóttandi og undirhaldandi actionhetja. 

Samuel L. Jackson spælir skurkurin og hann er tann mest undirhaldandi sjónleikarin í filminum. Hann yvirspælir á ein góðan máta, sigur stuttligar replikkir, tosar løgið og er tann stuttligasti persónurin í filminum. Tað er genialt, at Matthew Vaughn hevur ansett hann sum ein skurk, ið ræðist harðskap. Tað er ikki ein leiklutur, sum Samuel L. Jackson plagar at spæla. Tað er stuttligt, at síggja Mark Hamill aftur í einum filmi – sjónleikarin, sum spældi Luke Skywalker í gomlu "Star Wars"-filmunum. Hann hevur ein góðan hjáleiklut. Ungi sjónleikarin Taron Egerton spælir høvuðspersónurin í filminum og hann gevur eina góða framførslu. Hann er ein rættiliga góður og dámligur høvuðsleikari. 

Filmurin hevur ikki bara fantastiskar actionsenur, men er eisini sera stuttligur. Eg flenti hart fleiri ferðir. Skemtið er kreativt og óforútsiguligt. Tað varierar millium t.d. eina stuttliga joke, sum onkur sigur ella okkurt visuelt. Matthew Vaughn dugir væl, at balansera action og skemt. Hann hevur nú prógvað, at hann er ein av heimsins bestu actionleikstjórum. Søgan er ikki fantastisk, men rættiliga góð og inniheldur "twists", sum man ikki væntar frammanundan. Onkuntíð er hon forútsigulig, serliga nær við endanum, men filmurin klárar framvegis at vera undirhaldandi. Persónarnir eru dámligir og tað er ein stórur fyrimunur.

"Kingsman: The Secret Service" er ein fantastiskur actionfilmur. Satt at siga ein av teimum bestu í nýggjari tíð. Hann er sera stuttligur, undirhaldandi, kreativur og væl spældur. Hann er eisini sera ógvusligur og yvirdrivin – hann hevur uppiborið sítt 15 ára aldursmark. Dialogurin er undirhaldandi og allir sjónleikararnir gera sítt besta. Høvuðsleikarin, Taron Egerton, er góður og dámligur. Colin Firth er sera góður, og ein kulur og sannførandi actionsjónleikari. Samuel L. Jackson er sera stuttligur og undirhaldandi. Hann er tann mest minniligi sjónleikarin. Eg havi bert ein kritikk: Søgan er forútsigulig nær við endanum. Tað er ikki ein stórur trupulleiki. Hetta er fantastiskt undirhald; serliga fyri tey, sum dáma ógvusligir actionfilmar.

5 / 5 stjørnur

Leikstjóri: Matthew Vaughn 

Leikarar: Colin Firth, Michael Cain, Taron Egerton, Mark Strong, Sofia Boutella, 
Samuel L. Jackson, Sophie Cookson, Mark Hamill 
Ár: 2014