The Hobbit: The Battle of the Five Armies

Eg havi havt ein langan stegð, men nú byrji eg at ummæla filmar aftur. Eg eri sera seinur við hesum, men eg vil fegin deila mína meining um "The Hobbit: The Battle of the Five Armies". Hetta er tann triðji og seinasti filmurin í røðini.

Søgan heldur fram beint eftir tvey’arin. Bilbo og dvørgarnir mugu verja skattin á borgini, og samstundis fylgja vit álvunum og Gandalf. Sum eg havi sagt fyrr, so dámar mær "The Lord of the Rings", men eg eri ikki ein stórur fjeppari. Filmsrøðin "The Hobbit" er ikki líka góð, men mær dámdi rættiliga væl eittarin. Eg helt eisini, at tvey’arin var bert hampuligur við einum sera góðum enda. Nú havi eg sæð trý’arin og tíverri dámdi mær hann ikki sera væl. Vissu man er ein fjeppari av "The Lord of the Rings", so er stórur møguleiki fyri, at man fer at dáma hann. Filmurin tekur hyggjaran inn í hendan fiktionella heimin saman við persónum frá røðini og bjóðar nógvar actionsenur. Tað fara fjepparar at dáma og tað skilji eg væl.

Eg haldi, at hetta er tann veikasti "Hobbit"- og "Lord of the Rings"-filmurin higartil. Tann fyrsti "Hobbit"-filmurin var langdrigin, men gjørdist spennandi og undirhaldandi í seinnu helvtini. Hesin filmurin følist sum eitt klimaks, sum er strekt út til næstan 2 og ein hálvan tíma. Tað er kanska meiningin, men tann størsti trupulleikin er, at klimaksið er ikki nóg gott. Fyri tað fyrsta er Smaug ikki høvuðsskurkurin. Í staðin er tað er eitt grátt trøll, sum er ein láturligur og sera vánaligur skurkur. Hvørki hóttandi ella áhugaverdur og eg skilji ikki, hví hann skal vera høvuðsskurkurin í staðin fyri Smaug.

Søgan er sera tunn. Uttan at avdúka nakað, so handlar filmurin mest um, at verja skattin hjá dvørgunum. Tað hevði kanska riggað sum ein hálvur tími av einum øðrum filmi, men Peter Jackson hevur strekt tað út til ein langan spælifilm. Tað er ov langdrigið og tunt. Hetta er heldur ikki ein góður endakapittul samanumtikið. Hinir báðir filmarnir hava bygt upp til hendan og hann er næstan bara ein røð av endurtakandi actionsenum. Mær dámar sera væl actionfilmar, men hesin fangaði meg ikki. Actionsenurnar eru flott gjørdar, men ov nógvar í tali og ikki sera spennandi ella kreativar. Tær minna nógv um hvønn annan og følast meiningsleysar. Tað, sum persónarnir berjast fyri, er ikki stórt og áhugavert. Har er eingin spenningur. Summar løtur, sum skuldu vera spennandi, vóru láturligar – eg kann ikki avdúka tær. Endin á klimaksinum er ikki nøktandi og følist sum eitt anti-klimaks. Okkurt av dramainum riggar heldur ikki. Forholdið millum Tauriel og Kili er "cheesy" og óinteressant, og tað er ein týdningarmikil partur. Søgugongdin um Thorin er hampulig, men forútsigulig.

Framførslurnar eru góðar, tó ofta rættiliga avmarkaðar. Nógvir persónar eru bert álvarsamir ella illir. Tað riggar fínt, men tað ger teir ikki sera djúpir og áhugaverdir. Summi geva meira kenslubornar og áhugaverdar framførslur, sum t.d. Martin Freeman, Ian McKellen og Evangeline Lilly. Mær dámdi eisini væl Billy Connolly og Stephen Fry. Allir leikararnir eru góðir. Summi eru bara avmarkað av, at handritið ikki gevur teimum nógva variatión. Stemningurin er sera álvarsamur og tað hevði riggað, vissu søgan var spennandi, men tað er hon ikki. Tær bestu senurnar eru tvær, sum hava ein meira lættan og positivan stemning: Ein stutt sena, har Bilbo tosar um eina plantu og sjálvi endin á filminum. Tá var stemingurin øðrvísi og tað riggaði væl.

Hetta er ikki ein sera vánaligur filmur. Hann er væl gjørdur, men brúkar onkuntíð ov nógvar teldugjørdar effektir, væl spældur og bjóðar nógvar actionsenur. Man kann gott hyggja eftir honum, fyri at fáa tíðina at ganga. Endin á filminum er satt at siga mín yndissena. Filmurin hevur ein rættiliga góðan enda, sum er rørandi, væl spældur, hevur góðan dialog og hongur væl saman við fyrsta "Lord of the Rings"-filmin. Men eftir mínari meining er "The Hobbit: The Battle of the Five Armies" samanumtikið gloymandi, langdrigin og skuffandi. Skurkarnir eru vánaligir, teir flestu persónarnir eru eitt sindur tunnir, søgan er sera tunn og actionsenurnar eru ikki nóg góðar til, at fylla næstan allan filmin. Av tí at tað, sum persónarnir berjast fyri, er ov tunt, so følast actionsenurnar meiningsleysar. Hetta er ein tunnur endakapittul, sum byggir upp til eitt anti-klimaks við vánaligum skurkum.

2 / 5 stjørnur

Leikstjóri: Peter Jackson

Leikarar: Ian McKellen, Martin Freeman, Richard Armitage, Evangeline Lilly, Lee Pace, 
Luke Evans, Cate Blanchett, Orlando Bloom, Benedict Cumberbatch, Ken Stott, 
Hugo Weaving, Billy Connolly, Stephen Fry
Ár: 2014