Tann illa umtókti leikstjórin Michael
Bay er afturkomin við einum nýggjum “Transformers”-filmi. Hetta er tann fjórði í røðini. Fyri meg persónliga, so var eittarin
góður, tvey’arin sera vánaligur og trý’arin hampuligur.
Stjórnin í USA hevur ikki álit á Autobots longur, so tey
ætla sær at oyðileggja teir – við robottum, sum tey sjálvi framleiða. Autobots
goyma seg fyri at yvirliva. Ein mekanikari og hansara dóttir finna leiðarin,
Optimus Prime, og fara síðan út at hjálpa teimum við, at yvirliva og vinna yvir
einum óndum robotti, sum er eftir teimum.
Søgan í filminum gevur ikki meining og hon er ongantíð
orsøkin fyri, at man hyggur eftir einum “Transformers”-filmi. Eg havi ongantíð
lagt nakað í søgurnar. Mær dámdi eittarin sum býtt undirhald við kulum
actionsenum. Tað kann væl vera, at fjepparar av “Transformers”-filmunum fara at
dáma hendan filmin. Hann er bara meira av tí sama. Men hetta er satt at siga tann
vánaligasti filmurin, sum eg havi sæð higartil í ár – og ein tann mest
gloymandi.
Hetta er tann longsti filmurin í røðini og tað er tann
størsti trupulleikin. Hann er uml. 2 tímar og 45 minuttir langur, og hevur onga orsøk fyri tí. Hann hevur ikki nóg mikið av innihaldi. Tann seinna helvtin av
honum er ein røð av endurtakandi actionsenum, sum kundu havt verið klimaksið.
Filmurin er øgiliga langdrigin og føldist sum um, at hann ongantíð fór at enda.
Effektirnar eru væl gjørdar, men ofta illa designaðar. Robottarnir Autobots eru
hvørki dámligir ella áhugaverdir. Ein teirra hevur skegg og eina cigar, sum er gjørd úr
jarni, og tað sær býtt út. Eg eri keddur av, at ein av mínum yndissjónleikarum, John Goodman, leggur rødd til hann. Ein annar robottur hevur
eina snjalla og irriterandi rødd, sum ikki hóskar til. Summir eru enntá ikki
við í hinum filmunum og koma uppí hendan filmin uttan nakra
presentatión.
Burtursæð frá røddini hjá Optimus Prime, so eru
sjónleikararnir frá hinum filmunum ikki afturkomnir. Tað plagar at vera
skuffandi, men í hesum førinum er tað ein fyrimunur. Teir nýggju høvuðsleikararnir
eru betri. Mær dámar Mark Wahlberg nógv betri enn Shia LaBeouf. Tíverri leggur
man einki í persónarnir, tí teir eru illa skrivaðir. Tríggir
sjónleikarar í filminum eru góðir: Mark Wahlberg, Stanley Tucci og Kelsey
Grammer. Mark Wahlberg gevur eina góða framførslu og ger høvuðspersónin eitt sindur
dámligan. Stanley Tucci ger eitt sera gott arbeiði við einum leikluti, sum er illa skrivaður. Orsakað av hansara góðu framførslu, so er persónurin
toluligur. Kelsey Grammer er sera góður og fangandi.
Hinir persónarnir eru ódámligir. Dótturin eru
tolulig í byrjanini, men verður seinni irriterandi, tí hon bara grenjar og ger
lítið til nyttu. Filmsfólkini hava roynt, at gera hana líka pena sum Megan Fox,
men tað er miseydnað. Hon er ikki pen, tí hennara andlit er dekkað við ov nógv “make up”. Sjeikurin hjá henni er irriterandi og óinteressantur. Mær dámdi ikki
forholdini millum høvuðspersónarnir. Eg má tó viðganga, at mær dámdi uml. tann
fyrsta hálva tíman av filminum hampuliga væl. Tá var filmurin vánaligur, men
kortini undirhaldandi og mær dámdi persónin, sum Mark
Wahlberg spældi. Men tá ið persónarnir fóru avstað við Optimus Prime, gjørdist filmurin verri og
verri.
Mær dámar sera væl actionfilmar og hetta er tann
keðiligasti, sum eg havi sæð í langa tíð. Eg keddi meg gjøgnum næstan allan filmin, hóast hann hevur nógv action. Marknaðarføringin lýsti nógv, at robott-dinosaurar vóru við í filminum, men teir eru við í stutta tíð. Eg helt eisini, at ljóðeffektirnar vóru irriterandi
og larmutar. Summar ljóðeffektir larmaðu so hart, at eg helt fyri oyrini. Eg sá filmin í 3D og
effektin varð misbrúkt. Michael Bay brúkar tað til, at onkuntíð knappliga blaka
ein tilvildarligan, lítlan robott í forgrundina og tað er irriterandi. Skemtið er eisini vánaligt og einaferð fekk tann vánaligi dialogurin meg at flenna.
“Transformers: Age of Extinction” er tann vánaligasti
filmurin, sum eg havi sæð higartil í ár. Eg var ikki áhugaður og tað var strævið, at hyggja eftir honum í næstan tríggir tímar. Men tey, sum dáma allir hinir “Transformers”-filmarnir, fara kanska at dáma hendan filmin, tí hann bjóðar meira
av tí sama. Eg eri sjálvur troyttur av, at síggja tann sama filmin umaftur og
umaftur. Actionsenurnar eru keðiligar, endurtakandi og larmutar. Effektirnar eru ofta
væl gjørdar, men ljótt designaðar og onkuntíð ikki sannførandi. Mær dámar
sera væl actionfilmar, men hetta er tann keðiligasti,
sum eg havi sæð í langa tíð. Hetta er óivað ein av teimum vánaligastu “Transformers”-filmunum higartil.
1 / 5 stjørnur
Leikstjóri: Michael Bay
Leikarar: Mark Wahlberg, Stanley Tucci, Kelsey
Grammer, Nicola Peltz, Jack Reynor,
T. J. Miller, Peter Cullen, John Goodman
No comments:
Post a Comment