Edge of Tomorrow

Tom Cruise er afturkomin við einum nýggjum actionfilmi, sum eitur "Edge of Tomorrow". Søgan er um ein mann (Tom Cruise), sum verður brádliga hermaður í krígginum ímóti rúmdarverum. Tá hann fer í kríggj, livir hann tann sama dagin umaftur og umaftur. Hann roynir so at gagnnýta tað.

Mær dámar væl Tom Cruise sum sjónleikara, men av tí at eg var sera skuffaður av "Oblivion" í fjør, var eg eitt sindur skeptiskur um hendan filmin. Eg var tó áhugaður í treylaranum og glaður fyri at síggja, at filmurin hevði fingið góð ummæli. Eg eri glaður fyri at siga, at "Edge of Tomorrow" er ein rættiliga góður og undirhaldandi filmur. Tá eg sá hann í biografinum, vóru sera fáir áskoðarar til staðar og tað er spell. Eg vóni, at hann fer at fáa fleiri áskoðarar, tí tað hevur hann uppiborið.

Summi dáma hendan filmin kanska líka væl frá byrjan til enda, men tað geri eg tíverri ikki. Mær dámar hann rættiliga væl samanumtikið, men… eg helt sjálvur, at fyrra helvtin av honum var fantastisk, meðan seinna helvtin var bert okey. Tað eri eg keddur av at siga og eg fari at greiða frá seinni, hví eg helt tað. Men eg elskaði fyrru helvtina og satt at siga, so vil eg fegin síggja filmin umaftur. Hann er sera gott undirhald, sum er vert at síggja í biografinum.

Fyrra helvtin av filminum er fantastisk og tað havi eg ikki sagt um nógvir filmar higartil í ár. Handlingin um, at Tom Cruise livir sama dagin umaftur og umaftur, er sera undirhaldandi. Tað er kul at síggja, hvussu hann lærir av feilum, sum hann ger dagin fyri. Tað er eins og filmurin "Groundhog Day" við Bill Murray. Filmurin er eisini sera stuttligur. Skemtið er sera gott, væl gjøgnumført og ofta óforútsiguligt. Tann stuttligasti sjónleikarin í filminum er óivað Bill Paxton. Hann er sera stuttligur og undirhaldandi.

Actionsenurnar eru sera góðar, flott gjørdar og undirhaldandi. Krígssenurnar eru fantastiskar og væl gjøgnumførdar. Tann fyrsta krígssenan riggar serstakliga væl. Vit fylgja Tom Cruise allan vegin og tá ið senan byrjar, følist tað sum um, at man veruliga verður tveittur í ein stóran bardaga. Leikstjórin, Doug Liman, hevur gjørt eitt sera gott arbeiði. Framførslurnar eru góðar. Tom Cruise er sera góður og dámligur, Emily Blunt er sera góð og eg havi longu nevnt Bill Paxton, sum gevur ta mest minniligu framførsluna.

Tann seinna helvtin av filminum er bert okey, eftir mínari meining – men hon er ikki vánalig. Tað er gott, vissu summi dáma filmin líka væl allan vegin gjøgnum, tí tað vildi eg fegin. Men hon manglaði okkurt, sum gjørdi fyrru helvtina so góða. Í seinnu helvtini var tempoið seint, stemningurin meira álvarsamur og tann geniala handlingin um, at liva sama dagin umaftur, varð koyrd í bakgrundina – hon var framvegis til staðar, men fekk ikki líka nógv fokus sum frammanundan. Eg saknaði eisini skemtið, og samanspælið millum Tom Cruise og herin. Klimaksið var hampuligt og ikki meira enn tað. Eg misti eitt sindur áhugan í seinnu helvtini, men hon hevði tó nakrar sera góðar senur.

"Edge of Tomorrow" er ein rættiliga góður og undirhaldandi filmur. Tað er gott, at síggja Tom Cruise aftur í einum góðum poppkornfilmi. Handlingin er sera undirhaldandi og væl gjøgnumførd, actionsenurnar eru fantastiskar, persónarnir eru dámligir og søgan er rættiliga góð. Eg elskaði ta fyrru helvtina av filminum, meðan restin var okey. Handritið burdi havt verið betri balanserað, so at allur filmurin var líka góður. Men hetta er kortini ein filmur, sum eg vil fegin síggja umaftur. Tað er óivað ein av teimum frægastu poppkornfilmunum, sum eru komnir út higartil í ár.

3,5 / 5 stjørnur

Leikstjóri: Doug Liman 

Leikarar: Tom Cruise, Emily Blunt, Bill Paxton, Brendan Gleeson 
Ár: 2014