47 Ronin

Eg havi onkuntíð hugsað um, at vit hava ikki hoyrt um Keanu Reeves í fleiri ár. Hann er høvuðsleikarin í t.d. “The Matrix” og “Constantine”, og var fyrr ein av heimsins kendastu sjónleikarum. Aftána ein langan stegð er hann afturkomin við einum nýggjum actionfilmi, sum eitur “47 Ronin”.

Søgan er um ein mann (Keanu Reeves) sum veksur upp í Japan. Hann verður illa viðfarin, tí hann er hálvur japanari. Tá hann verður vaksin, hjálpir hann nøkrum fyrrverandi samurai’um, sum nú eru “ronin” – tað merkir ein samurai, sum hevur ongan harra. Teir ætla sær, at hevna seg inn á skurkin, sum drap teirra harra.

Hesin filmurin skuldi upprunaliga koma út í biografinum fyrr í ár, men varð avlýstur í Danmark og Føroyum, aftaná hann gjørdist ein stór fiasko í USA. Eg dømi ikki filmin eftir tí. Eg haldi bara, at tað er áhugavert fakta. Hvussu man úrslitið so vera? Eg kann fyrst og fremst siga, at hesin filmurin kundi havt verið sera góður. Tað er ein samuraifilmur, sum fer fram í Japan og hevur nógvar japanskar sjónleikarar. Men úrslitið er tíverri tann keðiligasti actionfilmurin, sum eg havi sæð í ár.

Eg havi ikki sæð nógvir filmar við Keanu Reeves uttan “The Matrix”, so eg eri ikki ein fjeppari av honum. Hann er ikki so galin í hesum filminum. Hann er ikki serstakliga góður, men í nógvum senum skal hann spæla, uttan at siga nógv og tað klárar hann fínt. Hann riggar eisini væl sum actionsjónleikari og hansara framførsla er ein av teimum frægastu í filminum. Nógvir sjónleikarar geva vánaligar framførslur, sum ikki eru sannførandi. Skurkarnir eru láturligir og illa leiktir.

Tann størsti trupulleikin við filminum er, at hann er uml. tveir tímar langur og oyðslar tað mesta av tíðini. Søgan er illa søgd, óruddilig og sera ófokuserað. Tempoið er so mikið seint, at í uml. helvtina av filminum hendir einki. Søgan sigst at vera um 47 menn, sum fara út á hevna seg, men vit hitta teir ikki fyrr enn sera seint í filminum. Tað tekur eisini ein heilan tíma inntil, at Keanu Reeves fer út á eina ferð. Tann fyrsta tíman hendir lítið og fleiri senur kundu verið kliptar úr. Harafturat er søgan so mikið ófokuserað, at hon onkuntíð knappliga skiftir høvuðspersón – tað er ikki altíð Keanu Reeves.

Søgan er illa samansett og følist onkuntíð sum tilvildarligar senur, sum ikki hanga saman. Hon greiðir heldur ongantíð frá, hví fólkini hava brúk fyri Keanu Reeves. Harafturat er tað strævið, at allar samrøðurnar í filminum greiða frá upplýsingum og baksøgum. Tað er ein keðiligur og óinteressantur frásøguháttur. Actionsenurnar eru einki serligt og ikki sera væl upptiknar. Tá ið persónarnir berjast, skiftir filmurin kameravinklar ov ofta og brúkar óinteressantar nærmyndir. Vinklarnir eru ikki serstakliga vánaligir, men teir fokusera ikki á nakað ávíst og saman við ta skjótu klippingini, so veit man ikki, hvat man skal hyggja eftir.

Burtursæð frá actionsenunum, so er kamerarbeiðið í filminum tó rættiliga gott. Summar senur hava vakurt landskap, búnarnir eru flottir og tónleikurin er hampuliga góður. Men tær flestu effektirnar eru vánaligar og ikki sannførandi. Eitt gott dømi er ein sena, har Keanu Reeves tosar við ein mann, sum hevur eitt ljótt teldugjørt høvd. Ein sera vánalig effekt, sum er strævin at hyggja eftir.

“47 Ronin” hevur eitt áhugavert konsept, men gjøgnumførir tað so illa sum til ber. Søgan burdi verið einføld, men er ístaðin ófokuserað og óruddilig – eitt sera vánaligt handrit. Tað tekur ein tíma, inntil Keanu Reeves byrjar ferðina og søgan kemur ov seint í gongd. Persónarnir hava ongar persónleikar og tær flestu framførslurnar eru vánaligar. Actionsenurnar eru óinteressantar og leikstjórnaðar uttan nakran stíl, skurkarnir eru láturligir, effektirnar eru vánaligar og tempoið er øgiliga seint. Hetta er ein vánaligur, langdrigin, illa skrivaður, illa leiktur og sera keðiligur actionfilmur – og Keanu Reeves hevur ikki skyldina, tí hansara framførsla er tolulig.

1 / 5 stjørnur

Leikstjóri: Carl Rinsch

Leikarar: Keanu Reeves, Hiroyuki Sanada, Tadanobu Asano, Rinko Kikuchi, Ko Shibasaki

Ár: 2013