Now You See Me

Eg var serliga áhugaður í hesum filminum, orsakað av sjónleikarunum, sum vóru savnaðir: Jesse Eisenberg, Woody Harrelson, Isla Fisher, Mark Ruffalo, Morgan Freeman, Michael Caine og onnur. Tað er eisini kul at síggja ein film um eitt lið av kendum sjónleikarum, sum arbeiða saman – eins og t.d. "Ocean's Eleven" og "The Avengers".

Søgan er um fýra gyklarar, sum verða leiktir av Jesse Eisenberg, Woody Harrelson, Isla Fisher og Dave Franco. Tey brúka teirra stóru sýningar í Las Vegas til, at stjala pening. Ein agentur frá FBI (Mark Ruffalo) og ein franskur detektivur frá Interpol (Mélanie Laurent) seta sær fyri, at steðga teimum, men tað vísir seg at vera sera torført, av tí at tey duga so væl at gykla.

Hetta er ein spenningsfilmur, sum siktar eftir at vera gott poppkorn-undirhald við eini óforútsiguligari søgu. Eg haldi sjálvur, at filmurin er okey og hampuliga undirhaldandi, men einki serligt og ikki sera minniligur. Tað er serliga orsakað av trupulleikum við handritinum. Men hann er væl leikstjórnaður og hevur sera góðar framførslur. Mær dámdi best framførslurnar hjá Morgan Freeman, Woody Harrelson og Mark Ruffalo.

Morgan Freeman er tann kulasti og mest minniligi persónurin í filminum. Hann ger allar sínar senur og frágreiðingar áhugaverdar og fangandi. Persónurin, sum hann spælir, er sera undirhaldandi og áhugaverdur. Woody Harrelson er stuttligur og undirhaldandi, og Mark Ruffalo gevur eina sera góða framførslu. Mær dámdi eisini væl Jesse Eisenberg, Isla Fisher og Michael Caine. Dave Franco var bert hampuliga góður.

Filmurin er væl leikstjórnaður av Louis Leterrier. Hann er flott gjørdur og hevur nógvar góðar senur. Eitt gott dømi er ein bardagi í eini íbúð. Hon er sera undirhaldandi og spennandi. Kameraarbeiðið er sera gott og kreativt. Onkuntíð flýgur tað runt um høvuðspersónarnir og tað riggar væl. Filmurin hevur eisini eina jagtsenu, sum brúkar langar óavbrotnar upptøkur, og tað er rættiliga kreativt. Tónleikurin er sera góður og fangandi. Hann hóskar væl saman við ta flotta kameraarbeiðinum. Gyklasýningar eru eisini undirhaldandi og áhugaverdar. Filmurin hevur óivað ein dugnaligan og kreativan leikstjóra.

Men tað, sum hindrar filminum at vera nakað serligt, eftir mínari meining, er handritið. Søgan er óruddilig og hevur leysar endar, og persónarnir eru eitt sindur tunnir. Eg hevði ringt við, at hava samkenslu við høvuðspersónunum. Teir eru dámligir og hampuliga undirhaldandi, men ikki sera minniligir – uttan Woody Harrelson. Sjónleikararnir geva sera góðar framførslur í leiklutum, sum ikki eru sera væl skrivaðir. Summir hjápersónar eru tó áhugaverdir og væl skrivaðir, sum t.d. leikluturin hjá Morgan Freeman.

Eg hevði ikki nakað serligt ímóti persónunum – uttan ein og tað komi eg til um eina løtu. Teir flestu eru bara ikki sera minniligir. Har var tó ein persónur, sum mær ikki dámdi: Tann franska kvinnan frá Interpol. Hon var keðilig og óinteressant. Hennara samanspæl við Mark Ruffalo er okey, men ikki áhugavert ella fangandi. Forholdið millum teirra er heldur ikki áhugavert og tað er ein stórur trupulleiki. Men teir størstu trupulleikarnir við filminum eru í søguni. Í fyrru helvtini er hon ikki nakað serligt, men okey og nóg mikið fangandi. Hon hevur eina áhugaverda handling, sum er faktiskt eitt sindur original, og nógvar góðar senur.

Hon er eisini full av “twists” og í fyrru helvtini riggar tað væl. Men í seinnu helvtini koma so nógv “twists”, at søgan verður ov óruddilig og fløkjaslig. Tann síðsti triðingurin av filminum var rættiliga óruddiligur og eg varð ørkymlaður. Søgan verður bara meira og meira fløkjaslig, og endar so við einum brádligum enda. Endin á filminum er faktiskt tað, sum mær dámdi minst. Eg helt hann vera vánaligan og skuffandi – eg fari sjálvandi ikki at avdúka, hvat hendir. Filmurin endar knappliga, uttan at svara nøkrum týdningarmiklum spurningum og hevur tí leysar endar. Harafturat er tann síðsta senan gloymandi og óinteressant – ein óinteressantur máti at enda filmin.

“Now You See Me” er okey at hyggja eftir, men samanumtikið einki serligt og eitt sindur gloymandi. Søgan hevur nógvar leysar endar og verður seinni ov óruddilig. Persónarnir eru eitt sindur tunnir og tí torførir at hava samkenslu við – teir bestu persónarnir eru teir, sum Morgan Freeman, Woody Harrelson og Mark Ruffalo spæla. Filmurin hevur tó nógvar góðar senur, eitt sindur av góðum skemti og nakrar undirhaldandi gyklasýningar. Hann er flott gjørdur, sera væl leiktur og samanumtikið væl leikstjórnaður, men hevur trupulleikar við handritinum og – eftir mínari meining – ein vánaligan enda.

2,5 / 5 stjørnur

Leikstjóri: Louis Leterrier

Leikarar: Jesse Eisenberg, Woody Harrelson, Isla Fisher, Dave Franco, Mark Ruffalo, Mélanie Laurent, Morgan Freeman, Michael Caine
Ár: 2013