Silver Linings Playbook

“Silver Linings Playbook” er ein filmur, sum gjørdist sera væl umtóktur í Amerika, tá hann kom út í 2012. Hann fekk nógvar Oscar-nomineringar og Jennifer Lawrence vann heiðurslønina fyri “Best Actress“. Nú er filmurin komin til Føroyar. 

“Silver Linings Playbook” er um ein mann (Bradley Cooper), sum hevur “bipolar disorder” – t.v.s. eina sálarliga sjúku, sum ger, at hansara lag broytist knappliga. Aftaná at hava sitið í sinnissjúkrahúsi, flytir hann inn hjá sínum foreldrum og nú vil hann koma saman aftur við sína fyrrverandi konu. Ein dagin hittir hann eina gentu (Jennifer Lawrence), sum eisini hevur sálarligar trupulleikar og tey gerast vinir.

Hetta er satt at siga ein av teimum bestu filmunum, sum eg havi sæð higartil í ár. Hetta er ein sera góður, stuttligur og væl spældur filmur. Eg havi ongantíð fyrr sæð Bradley Cooper í einum dramatiskum leikluti og eg varð imponeraður av honum. Hann gevur eina fantastiska og sannførandi framførlsu. Hann dugir væl at spæla ein persónur, sum knappliga skiftir lag. Jennifer Lawrence gevur eisini eina fantastiska framførslu. Hon hevur uppiborið sín Oscar. Samanspælið millum hana og Bradley Cooper er sannførandi, væl spælt og undirhaldandi. Robert De Niro gevur eisini eina sera góða og rørandi framførslu sum pápin hjá Bradley Cooper. Chris Tucker hevur ein lítlan leiklut og hann er rættiliga dámligur og stuttligur.

Filmurin er sera væl leikstjórnaður av David O. Russell. Hann tekur eina søgu um tvey sálarliga sjúk fólk og ger hana bæði dramatiska og stuttliga – og tað riggar. Filmurin hevur bæði skemt og drama, og David O. Russel klárar sera væl at balansera tað. Filmurin skiftir millum skemt og drama, uttan at tað følist ójavnt ella ov knappligt. Tað er perfekt balanserað. Skemtið er sera stuttligt og undirhaldandi, og dramaið er sera gott og sannførandi. Eg flenti ofta og varð onkuntíð rørdur. Filmurin vísir onkuntíð sjúkuna hjá Bradley Cooper á ein skemtiligan máta og tað riggar, men hann vísir eisini tær álvarsamu avleiðingarnar við henni.

Søgan er sera góð og fangandi. Eitt, sum er serstakliga gott við henni, er, at allir persónarnir hava trupulleikar; ikki bert høvuðspersónarnir. Meðan høvuðspersónarnir hava sálarligar trupulleikar, so hava onnur persónligar trupulleikar. Eitt dømi er ein vinmaður hjá Bradley Cooper, sum hevur trupulleikar við strongd. Tað besta við filminum er óivað forholdið millum Bradley Cooper og Jennifer Lawrence. Tað er sera væl gjørt. Tað er áhugavert at síggja tey práta um teirra trupulleikar. Mær dámar væl, at tey læra hvønn annan at kenna, av tí at tey hava somu trupulleikarnir og kunnu tí skilja hvønn annan. Teirra forhold verður væl uppbygt og riggar sera væl.

“Silver Linings Playbook” er ein sera góður, stuttligur og væl spældur filmur. Søgan er góð og fangandi, persónarnir eru dámligir og áhugaverdir, og David O. Russell hevur leikstjórnað filmin væl. Hann hevur eina perfekta banlansu millum skemt og drama, Bradley Cooper og Jennifer Lawrence geva fantastiskar framførslur, og Robert De Niro er eisini sera góður. Ein smákritikkur, sum eg havi, er, at man lærir ikki væl beiggjan hjá Bradley Cooper at kenna og tað ger hann til ein eitt sindur gloymandi persón. Samanumtikið dámdi mær sera væl hendan filmin. Skemtið fekk meg ofta at flenna og dramaið var sera væl gjørt – eg bleiv faktiskt einaferð rørdur og fór at tára eitt sindur. Eg má eisini leggja afturat, at endin á filminum er sera góður.

4,5 / 5 stjørnur

Leikstjóri: David O. Russell

Leikarar: Bradley Cooper, Jennifer Lawrence, Robert De Niro, Jacki Weaver, Chris Tucker

Ár: 2012