 |
| Leikstjóri Pierre Morel |
Søgan er um ein mann, sum eitur Bryan Mills (Liam
Neeson). Hann er ein fyrrverandi agentur, sum gavst fyri at brúka meira tíð
saman við síni dóttir, Kim (Maggie Grace) – hann og kona hansara eru skild. Hann
elskar Kim meira enn nakað annað í heiminum. Ein dagin ferðast hon til París
saman við vinkonuni og har verða tær brádliga fangaðar av einum albanskum harkaliði.
Bryan ger tá av, at ferðast einsamallur til París og brúka sína erfaring sum agentur,
til at finna sína dóttir og bjarga henni.
“Taken” hevur eina einfalda handling: Ein maður, sum
skal bjarga sína dóttir. Tað er eitt gott hugskot til ein actionfilm, um tað er
væl gjøgnumført. Og soleiðis er við “Taken”. Hetta er ein sera góður,
spennandi og undirhaldandi actionfilmur. Hann hevur eisini eina góða og
fangandi søgu – hóast hon er einføld og ikki sera original. Mær dámar sera væl,
at filmurin fokuserar bæði á action, søguna og persónarnir. Filmurin byrjar ikki beinavegin við action, men byrjar ístaðin við einum róligum inngangi, har man
sær m.a., hvussu støðan er í forholdunum millum Bryan, konuna og Kim, hvussu
gerandisdagurin er hjá Bryan og hvussu góður hann er við Kim. Man kemur tá til
at dáma Bryan og hava samkenslu við honum – og man kemur eisini til at dáma
familjuna. Tað syrgir fyri, at tá ið Kim so verður fangað, ynskir man veruliga,
at hann skal klára at bjarga henni. Um man ikki gjørdi tað, so hevði filmurin
ikki verið sera spennandi.
Filmurin er sera væl leikstjórnaður av Pierre Morel. Hann
syrgir fyri m.a., at filmurin koyrir alla tíðina við einum passaliga skjótum tempoi,
so at hann ongantíð verður keðiligur ella langdrigin. Actionsenurnar eru sera spennandi
og undirhaldandi. Tær innihalda m.a. spennandi og væl spældar bardagar, spennandi
skotbardagar og biljagtsenur. Mær dámdi eisini væl ljóð-effektirnar fyri
skotini. Tey ljóða hart og gera senurnar uppaftur meira spennandi. Liam Neeson
er sera góður í høvuðsleiklutinum. Hann gevur eina sera góða framførslu og er
eisini ein sera sannførandi actionhetja. Hann er ein sera dámligur
høvuðspersónur. Eg hevði nógva respekt fyri honum, orsakað av m.a., hvussu djarvur
hann var og hvussu hann brúkti heilan, tá hann bargdist ímóti onkrum. Tað gevur
eisini meining, av tí at hann er ein fyrrverandi agentur – hann hevur nógva
erfaring.
Pierre Morel dugir væl at balansera søguna og
actionsenurnar – við ørðum orðum, at fokusera bæði á søguna og action. Vit fáa
t.d. fyrst eina passaliga langa actionsenu og síðan eina áhugaverda senu, sum
fokuserar á leitanina eftir Kim. Hetta er ein actionfilmur við eini
dekektivsøgu og Pierre Morel dugir væl at fáa tað til at hanga saman. Filmurin
hevur stutt sagt eina góða balansu millum action og drama. Endin á filminum er
eisini sera góður og nøktandi – eg varð faktiskt eitt sindur rørdur. Men hvat
dámdi mær so minni væl við filminum? Filmurin hevur eina biljagtsenu á einum
byggiplássi og har helt eg, at kameraarbeiðið kundi verið betri. Kameraið risti
alla tíðina og eg skilji væl meiningina við tí, men onkuntíð risti tað so nógv,
at eg gjørdist eitt sindur ørkymlaður. Skurkarnir í filminum eru heldur ikki
sera minniligir ella áhugaverdir. Teir eru rættiliga týpiskir og eitt sindur
gloymandi. Eg haldi eisini, at vinkonan hjá Kim burdi havt ein størri leiklut. Hon er eisini í lívsvanda, eins og Kim, men man sær ikki nógv til hana gjøgnum filmin.
Samanumtikið er “Taken” ein sera góður, spennandi og
undirhaldandi actionfilmur við eini góðari søgu. Liam Neeson er ein av høvuðsorsøkunum til, at filmurin er so væl
eydnaður. Hann er sera dámligur, sannførandi og minniligur í høvuðsleiklutinum.
Filmurin hevur passaliga skjótt tempo og actionsenurnar eru sera spennandi og
væl leikstjórnaðar. Filmurin fokuserar bæði á spennandi action og eini áhugaverdari
detektivsøgu um leitanina eftir Kim, og tað ger, so at hann ikki er
meiningsleyst undirhald, men ein spennandi og undirhaldandi actionfilmur við eini góðari søgu –
hóast hon er rættiliga einføld.
4 / 5 stjørnur
No comments:
Post a Comment