The Disaster Artist

Í 2003 kom ein filmur út við heitinum "The Room". Hann gjørdist kendur fyri at vera ein tann vánaligasti filmurin nakrantíð, men kortini stuttligur at hyggja eftir. Eg sá hann langt síðani og eg flenti nógv. Leikstjórin, rithøvundurin og høvuðsleikarin var Tommy Wiseau; ein ókendur sjónleikari, sum gav eina sera vánliga og minniliga framførslu. Nú hevur James Franco leikstjórnað ein film um, hvussu "The Room" varð framleiddur – gjørt eftir bókini "The Disaster Artist" hjá Tom Bissell og Greg Sestero, sum er besti vinurin hjá Tommy.

Greg Sestero (Dave Franco) ynskir at vera ein kendur sjónleikari, men er eitt sindur smæðin. Hann verður vinur við Tommy Wiseau (James Franco); ein eldri, útlendskur, løgin og loyndarfullur sjónleikari. Hann vil ikki siga, hvørjum landi hann kemur frá ella hvussu gamal hann er. Teir flyta báðir til Los Angeles og royna at gerast sjónleikarar í Hollywood. Tommy ger av at skriva og leikstjórna ein film, og Greg hjálpir honum og fær ein leiklut.

Eg havi lurtað eftir ljóðbókini og tað er ein sera áhugaverd søga. Í gjár hugdi eg eftir filminum í Onglandi og hann gjørdist ein av mínum yndisfilmum í ár. "The Disaster Artist" er ein fantastiskur, stuttligur, undirhaldandi og áhugaverdur skemtifilmur. Søgan leggur dent á vinarlagið millum Greg og Tommy, og teir eru báðir dámligir persónar. Tommy er løgin og ófólkaligur, men sera stuttligur. Hann er ein sera vánaligur leikstjóri og sjónleikari, men tað er undirhaldandi at hyggja eftir. Dialogurin er minniligur og skemtið er sera stuttligt.

James Franco gevur eina fantastiska framførslu og hetta er ein avbjóðandi leiklutur. Um man hevur sæð "The Room" ella samrøður við Tommy Wiseau, so veit man, hann er ein løgin og óvanligur persónur í veruleikanum. Framførslan hjá James Franco er bæði stuttlig og sannførandi. Hann tosar líka sum Tommy Wiseau, men tað sær kortini ikki út sum, at hann bert hermir eftir honum – ein sannførandi framførsla. Dave Franco er sera góður og vinarlagið er sannførandi. Mær dámdi eisini væl Seth Rogen sum umsjónarmaðurin, ið roynir at halda skil á filminum hjá Tommy.

Filmsfólkini hava megnað væl at endurskapa senur frá "The Room". Tað er stuttligt og áhugavert at síggja framleiðsluna. Tað minnir um ein dokumentarfilm, serliga orsakað av myndatøkuni, sum er ofta handhildin. Hetta er ein áhugaverd søga um ein ambitiøsan leikstjóra, sum ikki hevur skil fyri at gera film. Mær dámar sera væl bókina og mín kritikkur er, at eg hevði fegin viljað sæð fleiri partar av framleiðsluni, sum vórðu nevnd. Hetta er ein góð og væleydnað filmatisering, men mær dámdi bókina eitt sindur betri. Hinvegin hava tey eisini tikið summir partar av bókini burtur, sum mær dámdi minni væl og tað er ein fyrimunur. Eg geri bara samanberingar og finni ikki nógv annað at kritisera. 

"The Disaster Artist" er ein tann besti filmurin, sum eg havi sæð í ár. Skemtið er sera stuttligt og tað er ein áhugaverd søga um, hvussu man ger ein vánaligan film. Tað er sera stuttligt at síggja framleiðsluna, og Tommy Wiseau er ein stuttligur og áhugaverdur høvuðspersónur. James Franco gevur eina fantastiska, stuttliga og minniliga framførslu, og hann hevur eisini gjørt eitt megnararbeiði sum leikstjóri.

                                                                                                                       

4,5 / 5 stjørnur 

Leikstjóri: James Franco 

Leikarar: James Franco, Dave Franco, Seth Rogen, Alison Brie, Ari Graynor, Josh Hutcherson, Jacki Weaver, Zac Efron, Hannibal Buress

Ár: 2017