The Peanuts Movie

Tann seinasti filmurin, sum eg ummæli í 2015, er nýggi teknifilmurin "The Peanuts Movie" – danska heitið er "Filmen om Radiserne: Med Nuser og Søren Brun". Eg ummæli ta ensku útgávuna. Hetta er ein nýggj filmatisering av gomlu teknirøðini og stuttfilmunum um Snoopy og Charlie Brown.

Vit fylgja dreinginum Charlie Brown og hansara hundi Snoopy. Charlie er ein óheppin drongur, sum er ópopulerur í skúlanum. Ein dagin kemur ein nýggjur næmingur í flokkin, ein reyðhærd genta, og Charlie verður beinavegin forelskaður. Samstundis roynir Snoopy at skriva eina skaldsøgu.

Hetta er ein einføld handling, sum syrgir fyri eina søgu, ið lýsir gerandisdagin hjá børnunum. Meðan Charlie Brown og Snoopy eru høvuðspersónarnir, so hevur filmurin eina rúgvu av hjápersónum. Hetta er ein filmur, sum vísir gerandisdagin hjá børnunum í bygdini og hvussu tað er, at ganga í fólkaskúla. Úrslitið er satt at siga ein av mínum yndisfilmum frá 2015.

Hetta er ein fantastiskur, sjarmerandi og nostalgiskur filmur, sum gjørdi meg í góðum lag. Tað er ein næstan perfekt filmatisering av teknirøðini. Eg var ikki ein stórur fjeppari av teknirøðini, tá eg var lítil, men eg las tær onkuntíð og hugdi ofta eftir teknifilmunum í sjónvarpinum. Eg minnist betri stuttfilmarnir og "The Peanuts Movie" er ein filmatisering, sum er sera trúføst ímóti stuttfilmunum.

Filmurin hevur ikki moderniserað persónarnir ella umhvørvið, og tað dámar mær sera væl. Snoopy brúkar framvegis eina skrivimaskinu, eins og í teknirøðini, hóast tað ikki er tíðarhóskandi í 2015. Animatiónin er fantastisk og vøkur. Hetta er ein 3D-filmatisering, sum líkist akkurát teimum gomlu teknirøðunum. Felagið handan filmin, Blue Sky Studios, hevur gjørt eitt fantastiskt arbeiði við, at endurskapa teknistílin í 3D. Tónleikurin er góður og filmurin hevur næstan ongar kendir sjónleikarar. Ókend børn leggja rødd til børnini og røddin hjá Snoopy er tikin frá gomlum upptøkum av Bill Melendez frá teknifilmunum. Tað riggar sera væl.

Mær dámar best, at søgan er um gerandisdagin hjá børnunum. Vit fygja teimum, meðan tey m.a. spæla og ganga í skúla. Tað er ein góð søga um barndóm. Sum hyggjari virkar tað sum um, at man býr í hesi bygdini og brúkar tíð saman við persónunum. Harumframt eru Charlie Brown og Snoopy sera dámligir høvuðspersónar. Charlie er ein fittur og fólkaligur drongur, og Snoopy er sera stuttligur. Senurnar við Snoopy, har hann dagdroymir og skrivar skaldsøguna, eru sera undirhaldandi og stuttligar. Filmurin hevur gott skemt og ein sera góðan enda. Mín einasti kritikkur er, at onkuntíð verða modernaðir sangir spældir, sum ikki hóska til stemningin. Filmurin er gamaldags og klassiskur, og so kemur brádliga ein modernaður sangur – tað hóskar ikki saman.

"The Peanuts Movie" er ein næstan perfekt filmatisering av Snoopy og Charlie Brown. Animatiónin er fantastisk, røddirnar eru góðar og hóskandi, og søgan er passaliga gamaldags. Handritið er skrivað av m.a. Bryan og Craig Schulz, sum eru eftirkomarar hjá rithøvundanum av teknirøðini, Charles M. Schulz, og tað sæst í filminum. Tað er ein sera trúføst filmatisering, sum ikki er moderniserað – burtursæð frá nøkrum sangum. Man hoyrir ongantíð, hvat tey vaksnu siga – eins og í stuttfilmunum – og mær dámar eisini væl, at filmsfólkini brúktu gamlar upptøkur til røddina hjá Snoopy. Tey hava gjørt sær ómak við, at endurskapa teknirøðina á stórskíggjanum og úrslitið er væleydnað.

  

4,5 / 5 stjørnur

Leikstjóri: Steve Martino 
Leikarar: Noah Schnapp, Hadley Belle Miller, Mariel Sheets, Alexander Garfin, 
Francesca Angelucci Capaldi, Troy Andrews, Kristin Chenoweth, Bill Melendez 
Ár: 2015