Jurassic World

Hetta árið bjóðar nógvir eftirfylgjarar til gamlir filmar og ein teirra er fjórði "Jurassic Park"-filmurin. Parkin er nú opnað við heitinum "Jurassic World". Vit fylgja tveimum dreingjum, sum eru ferðafólk í parkini, Owen (Chris Pratt), sum venir dinosaurar, og Claire (Bryce Dallas Howard), sum er fyriskipari. Vísindafólkini hava skapt ein dinosaur, sum er gjørdur úr ymiskum sløgum. Tað vísir seg at hava stórar fylgir.

Steven Spielberg hevur produserað filmin, men ikki leikstjórnað hann. Leikstjórin er Colin Trevorrow og man sær, at hann hevur roynt at gera ein "Jurassic Park"-film. Hann koyrir fleiri ting frá fyrsta filminum uppí, sum t.d. temasangin og summar spenningssenur. Men hvussu er úrslitið? Mær dámdi ikki filmin. Fyrra helvtin av honum riggar sum einfalt undirhald, men so fer hann av sporinum. Hetta er ein vánaligur og sera óruddiligur filmur – og mær dámar væl eittarin.

Tann størsti trupulleikin er stemningurin í filminum, handritið og leikstjórnanin hjá Colin Trevorrow. Filmurin er flott gjørdur, men illa samansettur. Stemningurin skiftir ofta brádliga millum at vera dramatiskur, skemtiligur og spennandi. Onkuntíð hevur filmurin eina ógvusliga actionsenu, sum roynir at vera spennandi og skiftir síðan brádliga til eina skemtiliga senu. 
Í síðsta triðinginum broytist filmurin til ein yvirdrivin actionfilmur. Uttan at avdúka nakað, so dáma summi væl klimaksið. Eg helt, at tað var flott gjørt, men tað kom ov seint uppí filmin. Tað var ov langdrigið.

Filmurin inniheldur nógv skemt. Áskoðararnir flentu ofta, so tað sær út til, at nógv fara at dáma tað. Eg helt, at skemtið riggaði bara, tá ið Chris Pratt segði okkurt stuttligt. Hann fekk meg onkuntíð at flenna, men í restini av filminum helt eg, at skemtið var vánaligt. Tað riggaði ikki fyri meg. Fleiri jokes vóru forútsiguligar. Ein ávísur persónur í einum tøknirúmi roynir alla tíðina at vera stuttligur og mær dámdi hann ikki. Hann var irriterandi og segði nakrar øgiliga vánaligar jokes. Eg eri heldur ikki nøgdur við leikstjórnanina hjá Colin Trevorrow. Hann roynir onkuntíð at byggja upp spenning, eins og Steven Spielberg gjørdi við eittaranum, men tað miseydnast næstan altíð. Hann hevur ikki skil fyri, hvussu man byggir upp spenning og ger senur nervapirrandi.

Einaferð goyma Chris Pratt og Bryce Dallas Howard seg fyri dinosaurinum og tað er meiningin, at tað skal vera nervapirrandi. Men tað er miseydnað, tí man sær allan dinosaurin í bakgrundini. Í eittaranum var tað spennandi, tá ið børnini goymdu seg fyri dinosaurum í køkinum, m.a. tí man visti ikki, hvar dinosaurarnir vóru. Í hesum førinum veit man, hvar dinosauruin er og hann fyllir næstan alla myndina. Tað er ikki spennandi. Framførslurnar eru annars góðar. Chris Pratt er sera góður. Mær dámdi hann best. Hann er kulur, sera dámligur og onkuntíð rættiliga stuttligur. Bryce Dallas Howard er hampuliga góð. Børnini gevur góðar framførslur, men persónarnir, sum teir spæla, eru ikki dámligir.

Stóribeiggin er irriterandi, grenjutur og óreinur. Einaferð fer lítlibeiggin at gráta, tí hann er stúrin fyri foreldrini hjá sær og hvat ger stóribeiggin? Hann skeldar og sigur, at hann er líkaglaður, tí hann skjótt fer burtur at lesa. Harafturat er hann ofta ikki áhugaður í parkini og tímir ikki at vera har – hóast tað er meiningin, at vit hyggjarar skulu vera áhugað. Hann er sera ódámligur.

Effektirnar eru góðar, men samstundis skuffandi. Dinosaurarnir eru teldugjørdir og næstan ongantíð gjørdir úr praktiskum effektum. Eittarin hevði bæði og tískil haldi eg, at eittarin, sum kom út í 1993, hevur framvegis tær bestu effektirnar. Hesin filmurin hevur góðar effektir, men tær eru ikki fantastiskar og sjáldan imponerandi. Tónleikurin hjá Michael Giacchino er hampuliga góður, men eisini skuffandi. Temasangurin verður brúktur beinavegin í byrjanini á filminum, áðrenn persónarnir koma til parkina, og hann hóskar tíverri ikki til. Vit síggja bara fólkini práta, koyra við toki og annað, sum hevur einki við dinosaurar at gera. Temasangurin hóskar ikki til senurnar.

Fyrra helvtin av "Jurassic World" er hampuliga undirhaldandi og hevur góðar løtur. Mær dámdi væl, at Owen dugdi at venja dinosaurar. Man følir seg eisini sum eitt ferðafólk í parkini. Men hví skal tann eini høvuðspersónurin so vera ein drongur, sum ikki tímir at vera har? Samanumtikið er hetta ein sera óruddiligur filmur, sum hevur ein skiftandi stemning, barnsligt skemt og býttar persónar. Hví royna hermenninir at fanga ein risastóran dinosaur við bert lítlum netum og lítlum vápnum, sum geva støt? Hesin filmurin hevur ov nógvar feilir til, at vera ein góður "Jurassic Park"-filmur.

2 / 5 stjørnur

Leikstjóri: Colin Trevorrow

Leikarar: Chris Pratt, Bryce Dallas Howard, Ty Simpkins, Nick Robinson, B.D. Wong, Vincent D’Onofrio, Jake Johnson, Omar Sy 
Ár: 2015