The Secret Life of Pets

Illumination Entertainment er felagið handan m.a. "Despicable Me" og "The Lorax". Hetta er so teirra næstnýggjasti filmur, "The Secret Life of Pets". Vit fylgja nøkrum kelidýrum í New York og síggja, hvat tey gera um dagin, meðan eigararnir eru burturstaddir. Hundurin Max (Louis C.K.) verður illur, tá ið eigarin adopterar hundin Duke (Eric Stonestreet). Nú er Max brádliga noyddur til at hava ein beiggja. 

Hetta er ein fittur, undirhaldandi og stuttligur teknifilmur, sum riggar orsakað av skemtinum og persónunum. Søgan er hampulig, men kundi verið betri. Hon líkist nógv "Toy Story", men við djórum í staðin fyri leikutoyum: Teirra gerandisdagur, meðan eigararnir eru úti og høvuðspersónurin, Max, verður øvundsjúkur inn á tað nýggja kelidýrið í húsinum – tað sama hendi við Woody, tá ið Buzz Lightyear flutti inn. Tíbetur verður søgan fangandi, av tí at hon eisini handlar um vinfólkini hjá Max. Tað er stuttligt at síggja tey ferðast runt í býnum. 

Mær dámar filmin, tí persónarnir eru minniligir og skemtið er sera stuttligt. Mínir yndispersónar eru hundurin Gidget (Jenny Slate), kettan Chloe (Lake Bell) og fuglurin Tiberius (Albert Brooks). Sjónleikararnir hóskar væl til og tey eru stuttlig á hvør sín máta. Gidget er illsint og djørv, men samstundis lítil og fitt. Chloe hevur ein stuttligan og týpiskan persónleika hjá eini kettu: Forvitin, dámlig, gronut og verður lætt bangin. Tiberius er tann stuttligasti, tí hansara skemt er dapurt og kreativt: Ein klombrutur kjøtetari, sum roynir at lata vera við at eta djór. Hann fekk meg ofta at flenna. Tað er dapurt skemt, sum børn kunnu hyggja eftir, men er stuttligari hjá teimum vaksnu. Tað er eisini minniligt og skilir seg frá øðrum teknifilmum. 

Sjónleikararnir eru góðir og mær dámdi best Jenny Slate, Lake Bell og Albert Brooks. Mær dámdi eisini væl Louis C.K. og tað er stuttligt at hoyra røddina hjá Kevin Hart koma frá eina lítla kanin. Eg haldi tó, at røddin hjá Hannibal Buress hóskar ikki til hundin Buddy. Hann gav ikki eina vánaliga framførslu, men ein onnur rødd hevði hóskað betri til leiklutin. Animatiónin er vøkur og bakgrundirnar líkjast onkuntíð málningum. Tónleikurin hjá Alexander Desplat er sera góður og undirhaldandi. 

"The Secret Life of Pets" er samanumtikið ein góður, fittur og minniligur teknifilmur, sum eg viðmæli orsakað av persónunum og skemtinum. Persónarnir eru stuttligir, eg flenti ofta og endin er sera góður. Um eg skal nevna kritikkir, so er søgan eitt sindur tunn, men nóg mikið fangandi orsakað av persónunum, og einaferð blívur man við at síggja eina plakat fyri "Sing", sum er nýggjasti filmurin hjá Illumination Entertainment. Mær dámdi ikki mátan, ið plakatin varð víst, tí tað virkaði sum ein lýsing fyri ein annan film. Annars er filmurin verdur at síggja, tí hann vísir gerandisdagin hjá kelidýrum á ein stuttligan máta.

3,5 / 5 stjørnur 

Leikstjóri: Chris Renaud 

Leikarar: Louis C.K., Eric Stonestreet, Kevin Hart, Jenny Slate, Ellie Kemper, Lake Bell, Dana Carvey, Hannibal Buress, Bobby Moynihan, Steve Coogan, Albert Brooks 

Ár: 2016