Prisoners

Tað hevur ikki ligið væl fyri hjá mær, at fara í biograf tær seinastu vikurnar. Eg sá hvørki “The Hunger Games: Catching Fire” ella “Ender’s Game”. Eg hugdi eftir “Captain Phillips”, “Bad Grandpa” og “Escape Plan”, men tá var tað ov seint at ummæla teir. 

Eg kann tó nevna, at eftir mínari meining var “Captain Phillips” fantastiskur og spennandi (5/5 stjørnur), “Bad Grandpa” sera stuttligur (4/5 stjørnur) og “Escape Plan” undirhaldandi (3,5/5 stjørnur). Eg fari vónandi at síggja “The Hobbit: The Desolation of Smaug” seinni hesa vikuna og nú havi eg endiliga sæð krimifilmin “Prisoners”.

Søgan er um ein mann, Keller Dover (Hugh Jackman), sum upplivir nakað ræðuligt. Hansara unga dóttir, Anna, hvørvur knappliga saman við vinkonuni Joy. Hetta verður meldað til løgregluna og ein detektivur, sum eitur Loki (Jake Gyllenhaal), fer at kanna málið. Vit fylgja eisini Keller, sum er desperatur eftir, at finna sína dóttir.

Hetta er ein spennings-/krimifilmur við meira dent á krimi. Tað er ein djúp detektivsøga, sum verður søgd frá sjónarhornunum hjá pápanum og detektivinum. Tað er sera væl gjøgnumført og úrtslitið er tí ein av ársins bestu filmum. Hetta er tann mest dapri og deprimerandi filmurin, sum eg havi sæð í ár, og einki er galið við tí. Hann gjøgnumførir tað, sum hann skal. Hann fær hyggjaran til at føla hesa ræðuligu støðuna. Man følir sorgina og ræðsluna, sum familjurnar hjá gentunum uppliva. Stemningurin er dapur og syrgiligur, og tað hóskar til støðuna. Man sær, hvussu hendingin ávirkar gerandisdagin hjá familjunum og teirra forhold. Tað ger søguna fangandi og spennandi.

Filmurin er sera væl leikstjórnaður og spældur. Eins og eg segði í áðni, so avspeglar stemningurin í filminum støðuna, sum familjurnar eru í. Hann er sera dapur og deprimerandi. Eg hevði samkenslu við familjunum – serliga Keller – og ynskti, at tey skuldu finna teirra døtur. Søgan er óforútsigulig og riggar sera væl sum ein detektivsøga. Tað er ein spennandi og gátufør søga, sum gevur hyggjaranum nógv at hugsa um aftaná. Framførslurnar eru sera góðar og sannførandi. Hugh Jackman er fantastiskur í filminum. Hansara kenslur eru sera sannførandi. Jake Gyllenhaal er sera góður og filmurin hevur eisini góðar framførslur frá Terrence Howard, Viola Davis og Maria Bello.

Hetta er ikki ein filmur, sum er behagiligur at hyggja eftir. Hann hevur ikki bara eina dapra søgu, men eisini nakrar óbehagiligar senur. Summar senur vísa óbehagiligar myndir, og aðrar byggja upp nógvan spenning og verða nervapirrandi. Tað riggar væl, tí tað ger søguna uppaftur meira fangandi og sannførandi. Drama’ið følist veruligt og realistiskt. Tað er serliga orsakað av framførslunum, sum eru fantastiskar. Tað riggar eisini væl, at søgan hevur nógvar yvirraskilsir og gevur hyggjaranum nógv at hugsa um aftaná.

“Prisoners” er ein sera góður, spennandi, deprimerandi og óbehagiligur krimifilmur. Søgan er væl skrivað og óforúsigulig, og leikstjórin syrgir fyri, at hon følist verulig og sannførandi. Stemningurin er dapur og syrgiligur, dialogurin er áhugaverdur og framførslurnar eru fantastiskar. Har vóru nakrar fáar hendingar í søguni, sum eg helt kundi verið betri skrivaðar, men samanumtikið er søgan góð og sera spennandi. Eg hevði samkenslu við persónarnir og var áhugaður í, at loysa gátuna. Tað er eisini áhugavert, at man sær søguna frá sjónarhornunum hjá bæði detektivinum og familjunum. Tað vísir væl, hvussu ein slík hending ávirkar fólk.

4,5 / 5 stjørnur

Leikstjóri: Denis Villeneuve

Leikarar: Hugh Jackman, Jake Gyllenhaal, Viola Davis, Maria Bello, Terrence Howard, Melissa Leo, Paul Dano

Ár: 2013